حزب کمونیست کارگری یانچیسی محسن ابراهیمی نین دری قابیقدان چیخماسی

 

گونئی آذربایجان توپلوموندا انسانلارین اؤز میللی منلیک و کیملیکلری اوزره ایلگی و ماراقلاری نین آرتماسی فارس ایستعمار تشکیلاتلارینا آیاقچی اولموشلاری او جمله دن محسن ابراهیمی نی داغا داشا سالمیش گؤرونر. محسن ابراهیمی کئچمیش مقاله لرینده "ناسیونالیسم" دئیه دیل و مدنیت اوغروندا ساواش آپاران گونئی آذربایجان میللی فعاللاری علیهینه چیرکین ایفاده لر سرگیلمک ایله، او جومله دن "ناسیونالیست فاسد، فاشیست قوم پرست، پان ترکیست، فاشیست آذری، ناسیونالیست خطرناک و مضر آسایش و سعادت بشر، (عامل) نفاق علیه انسان و انسانیت و  خرافاتچی" دئیه فارس ایستعمارچیلیغینا خوش خدمتلیگینی سرگیلمیش[i]. آشاغیدا اله آلماق ایستدیگیمیز  مقاله سینده  میللیتلر مسئله سینی اهمیتسیز گؤسترمک اوچون "ناسیونالیسم ایرانی و ناسیونالیسم ترک" دئیه "ایرانیت" داشینی گونئی آذربایجان میللی حرکتی نین قاباغینا دیغیرلاتماق و اؤز ذهنیتینده بیر مانع یاراتماغا چالیشمیش، یئری گلمیشکن اونون یازیسی نین بعضی مقاملارینی گؤتور قوی ائتمگه چالیشاق، اوخویوروق:

"ناسیونالیسم تحت ستم نداریم! ظاهرا ناسیونالیسم ایرانی و ناسیونالیسم ترک دو نیرو و دو جنبش در مقابل هم هستند. اولی عظمت طلب، مسلط، ستمگر و غالب است و دومی محکوم و تحت ستم و تحت سلطه"[ii].

مؤللیفین ایفاده ائتدیگی "ناسیونالیسم" کلمه سی نین اوزرینده دوراقلارساق، گونئی آذربایجان میللی فعالارینا نسبت وئردیگی بو ایفاده بوهتان ماهیتی داشییان بیر دئییم کیمی اورتایا آتیلمیش گؤرونر. دئمک، گونئی آذربایجان میللی حرکتی فعاللاری هئچ زامان بو حرکتی "–ایسم/-یسم" باشلیغی آلتیندا یوروملامیش و تانیملامیش دئییللر.  

محسن ابراهیمی "ناسیونالیسم ایرانی و ناسیونالیسم ترک" دئییملرینی اورتایا آتماقلا دیل و مدنیت مقوله لریندن اولدوقجا اوزاق اولدوغونو و یالنیز فارس ایستعمارچیلیق ادبیاتیندان فایدالاناراق معنوی احتیاجلارینی گئدرمگه چالیشدیغینی، بئله لیکله مفکوره باخیمیندان فارس ایستعمارچیلیغی نین ترکیب حیسسه سی ائدیله رک دوشونجه یئریتدیگینی اورتایا قویار.

دئمک، دیل بیلیمینده 1836 -اینجی ایل هیندشیناس Christian Lassenطرفیندن اورتایا آتیلمیش "ایران دیل قوروپو" ایفاده سی یالنیز فارس دیلی اوچون دئییل، بیر دیل قوروپونا وئریلمیش و بیلیم اوجاقلاری طرفیندن قبول اولموش آد ساییلار[iii]. دئمک، دیللر و مدنیتلر اساسیندا "ناسیونالیسم ایرانی" دئییمی نی اورتایا قویانلار ایستر، ایستمز پان ایرانیستلیگین فارس ایستعمارچیلیغی مفکوره سینه قاتقیدا بولونموش اولارلار. کئچمیش یازیدا محسن ابراهیمی و داریوش همایونون گؤروشلری نین فارس ایستعمارچیلیغی دوغرولتودا کسیشدیکلری نقطه یه ده تانیق اولدوق[iv]. باشقا یاندان، "ایران" کلمه سی نین بیر سیاسی آلانا نسبت وئریلمه سی منظور اولارسا، بوگون بو ایران آدلانمیش ایران ممالیکی محروسه سینده مختلیف دیل و مدنیت صاحابلاری یاشامالارینا باخمایاراق سیاسی نیظام و اینتیظام باخیمیندان بیر چوخلاری اوچون قبول ائدیلمه سی آجی دا اولسا، فارس ایستعمارچیلیغی حؤکوم سورمکده دیر. یئری گلمیشکن بونو دا دئمکده فایدا وار: بوگون ایران دیل قوروپونا قوشا (پارالئل و موازی) اولاراق دیل بیلیمینده تورک دیللری یوخسا تورک دیل قوروپو دا قبول اولموش، بیلیمه دایالی بیر آد ساییلار[v].

دئمک، فارس ایمپراتورلوغو و ایستعمارچیلیغی نی "ایران میللتی" باشلیغی آلتیندا حزب کمونیست کارگری ایران- فارس محفلی نین ناسیونالیسم "عظمت طلب" آدلاندیرماسی دا فارس ایستعمارچیلیغی و فارس مدنیت راسیستلیگی دوغرولتوسوندا ژوبین رازانی (منصور حکمت) یانچیلاری طرفیندن اورتایا آتیلمیش بیر یئنی تاپینتی (اختراع) ساییلار. بو تاپینتییا اساسن ایران ممالیکی محروسه سینده میللی ظولوم دئیه بیر آنلاییش قبول ائدیله بیلمز. فارس ایستعمار یانچیلاری و مدنیت راسیستلرینه گؤره دؤلت – میللت آنلاییشی رضا شاه طرفیندن اورتایا قویولموش و فارس ایستعمارچیلاری و فارس مدنیت راسیستلری طرفیندن آسدی و کسدی واسیطه سی ایله قبول اولوندوغو اوچون هر هانکی فارس اولمایان ائتنیکلرین دیل و مدنیت مسئله لری ده "خرافاتی، قوم پرست، ناسیونالیست فاسد، مخل نظم، غیر انسانی، ..." دئیه قلمه آلینمالی ایمیش[vi]. محسن ابراهیمی و منصوب اولدوغو محفل، فارس حاکیم دیل و مدنیت سیستیمی نی "ناسیونالیسم عظمت طلب"  دئیه قمله آلماسی دا توپلوم تانیما (جامعه شناسی) بیلیمی باخیمیندان دیققت چکیجی ساییلار. دئمک، باسقییا معروض قالمیش میللی حرکتلره اوسته کی چیرکین و پیس صفتلری  نسبت وئرمک، اؤزلرینی منصوب ائتدیکلری حاکیم دیل و مدنیت دؤولتچیلیگی نی یاخشی صفتلر ایله بزه مک  و "بیزیم قوروپ: - یاخشی، انسانی، باشاریلی"، "او بیری قوروپ: - پیس و غیر انسانی و باشاریقسیز" ایفاده لری توپلوم تانیما بیلیمینده قوروپلار آراسیندا تانینمیش بیر چیخیش و نظر ساییلار[vii]. محسن ابراهیمی گئنه ده یازمیش:

"... لازم است تاکید کنیم که ناسیونالیسم به مثابه یک جنبش نمیتواند تحت ستم باشد. این مردم منتسب به یک ملت، نژاد و یا قوم معینی هستند که مورد ستم و تبعیض قرار میگیرند. ناسیونالیسم "تحت ستم"، معمولا از ستم و تبعیض اعمال شده بر مردم معینی به عنوان ماتریال اجتماعی استفاده میکند تا برای خودش به مثابه یک جنبش مشروعیت سیاسی دست و پا کند"[viii].

اوسته گؤروندوگو کیمی محسن ابراهیمی بیر ماتئریالیست کیمی بحث ائتمک ایستدیگینه باخمایاراق روحانیت دونیاسیندا سئیر و حرکت ائتمکله لمس اولوناجاق واقعیتلری ده درک ائتمک ایسته مه یه رک کلمه لر ایله اوغراشاراق جمله قورماغا چالیشار.  بئله لیکله، ناسیون کلمه سی نین نه اولدوغونو دا درک ائتمک ایستمز. یئری گلمیشکن آلمانی سؤزلوک کتابیندان ناسیون کلمه سی نین نه اولدوغونو دا اؤیرنمیش اولاق: دوغولدوغو یئر، دیل، گله نک (عنعنه)و گؤره نک (عادت)، مدنیت و سیاسی گلیشمه لر اساسیندا بیر بیرلرینه باغلی اولان توپلوم ناسیون (Nation) و خالق (Volk) ساییلار[ix].

اوسته کی وئریلمیش تعریفه اساسن ائتنیک آذربایجان: آذربایجان تورکلری نین دوغولدوقلاری یئر (آذربایجان). دیل: آذربایجان تورکلری نین دانیشدیغی و ادبیات دیلی ائتدیکلری آذربایجان تورکچه سی. گله نک، گؤره نک: آذربایجان تورکلوگونه عایید اولموش معنوی دگرلر، عادت و عنعنه لر. مدنیت: آذربایجان تورکلوگونه عایید اولموش تاریخی عابیده لر و اثرلر. سیاسی گلیشمه لر: آذربایجان تورکلوگو تاریخده دیل بیلینجی و تاریخ بیلینجیندن یوخسول قالدیغی اوچون، آذربایجان مشروطه حرکاتی زامانی، آذربایجان سیاسی ائلیتی زامانی درک ائتمه یه رک خاریجی عامیللر واسیطه سی ایله حاکیمیتچیلیگی فارس میللیتچیلیگی و ایستعمارچیلیغینا اودوزاراق مغلوب ائدیلمیش و بئله لیکله آذربایجان تورکلوگو مستعمره آلتینا کئچمیش بیر میللت ساییلار.

دئمک، بو باسقی آلتینا آلینمیش توپلومو نماینده لیک ائدن میللی حرکت ده بو توپلومون آیریلماز بیر پارچاسی اولاراق ایستعمارچیلیغا تابع توتولموش آذربایجان تورک وارلیغی نین سیاسی ائلیتی ساییلار. دئمک،  باسقیلارا سئیریجی قالمایاراق میللی حرکتین عضولری سورگون و توتساق اولماغی جان کؤنول ایله قبول ائتمیش گؤرونرلر. بئلنچی آجی واقعیتلری گؤز اؤنونه آلاراق داها آرتیق قضاوتی اوخوجولارا بوراخارساق، داها یاخشی اولار دئیه دوشونورم. محسن ابراهیمی گئنه یازیر:

"حدود یک قرن و نیم پیش، ۳۲ کشور مستقل در جغرافیای سیاسی جهان وجود داشتند. امروز این تعداد به بالای ۱۹۰ رسیده است. مشخصا در ۱۱۱ سال گذشته ۱۴۱ کشور مستقل اعلام موجودیت کرده اند. یعنی در کمتر از یک سال یک کشور جدید چشم بر جهان گشوده است. یک "ملت" جدید صاحب کشور شده است"[x].

اوسته گؤروندوگو کیمی ایدئولوژی باخیمیندان حاکیمیتچیلیگه سوسامیشلارین میللت آنلاییشلاری دیل و مدنیته اساسیندا قورولموش میللی دؤلتلر دئییل، اونلارین میللت آنلاییشلاری ایستر ایمپراتورلوقلارین داغیلماسی نتیجه سینده و ایسترسه ده غرب ایستعمار دؤلتلری نین یئرلی خالقلارا ایستعمار دیلینی تحمیل ائتدیکدن سونرا اونلارا ایستعمار دیلی اساسیندا هیندوستان، پاکیستان و آفریقا مودئلینده ایداره اولونموش مملکتلر، یوخسا دا کیچیک قارداش دئیه ایران مودئلینده مملکتلرین داغیلمادان باشقا بیر ائتنیک و میللتین انحصارینا کئچیرمه سی منظور اولونار. محسن ابراهیمی نین، مظلوم خالق اوولادی اولاراق بئلنچی ایستعمار ماهیتلی گؤروشلری بیر منطیق دئیه فارس ایستعمار محفللریندن قبول ائتمه سی و بو ایستعمار محفللرینه آیاقچیلیق ائده رک بو محفللره آذربایجان کمیته سی یاراتماسی داها دوغروسو دهشت ساییلار. قیسا سؤزله دئمک جاییزسه، حاکیم اولموش بیر دیل و مدنیتده، کؤله دورومونا دوشموش انسانین منسوب اولدوغو خالقی اؤزگه ساییلماسینا و یوخلوغا محکوم گؤرونمه سینه باخمایاراق بو انسانین بئلنچی حاکیمیت کیملیگینی میللی کیملیک دئیه قبول ائتمه سی مدنیت راسیستلیگی ساییلار.

 

قایناقلار و اتک یازیلار:

 


 

[i]            ایشیق سؤنمز، حزب کمونیست کارگری ایران- فارس محفلینه باغلی اولان محسن ابراهیمی نین "ناسیونالیست" حئکایه سی: http://www.isiqsonmaz.com/Seite%20336.htm

[ii]           محسن ابراهیمی، : ستم ملی در آذربایجان و راه حل آن! (قسمت دوم) ناسیونالیسم تحت ستم نداریم!  نشریه روزنه اورگان حزب کمونیست کارگری ایران- فارس، کمیته آذربایجان، شنبه, 19 بهمن 1392!: https://rowzane.com/notes/7256-%D9%85%D8%AD%D8%B3%D9%86-%D8%A7%D8%A8%D8%B1%D8%A7%D9%87%DB%8C%D9%85%DB%8C-%D8%B3%D8%AA%D9%85-%D9%85%D9%84%DB%8C-%D8%AF%D8%B1-%D8%A2%D8%B0%D8%B1%D8%A8%D8%A7%DB%8C%D8%AC%D8%A7%D9%86-%D9%88-%D8%B1%D8%A7%D9%87-%D8%AD%D9%84-%D8%A2%D9%86-%D9%82%D8%B3%D9%85%D8%AA-%D8%AF%D9%88%D9%85-%D9%86%D8%A7%D8%B3%DB%8C%D9%88%D9%86%D8%A7%D9%84%DB%8C%D8%B3%D9%85-%D8%AA%D8%AD%D8%AA-%D8%B3%D8%AA%D9%85- %D9%86%D8%AF%D8%A7%D8%B1%DB%8C%D9%85.html   

[iii]          ایشیق سؤنمز، ایران دؤلتی و ایران دیل قوروپو آدی نین اورتایا آتیلماسی: http://www.isiqsonmaz.com/Seite269.htm

[iv]          باخ اورادا، ایشیق سؤنمز، حزب کمونیست کارگری ایران- فارس محفلینه باغلی اولان محسن ابراهیمی ...

[v]           Turksprachen: http://de.wikipedia.org/wiki/Turksprachen

[vi]          باخ اورادا، ایشیق سؤنمز، حزب کمونیست کارگری ایران- فارس محفلینه باغلی اولان محسن ابراهیمی ...

[vii]          König, Oliver und Schattenhofer, Karl; Einführung in die Gruppendynamik, Heidelberg 2006.

[viii]         محسن ابراهیمی، : ستم ملی در آذربایجان و راه حل آن! (قسمت دوم) ناسیونالیسم تحت ستم نداریم!، باخ اورادا.

[ix]          Wahrig, Deutsches Wörterbuch, çap Munix, S. 925.

[x]           محسن ابراهیمی، : ستم ملی در آذربایجان و راه حل آن! (قسمت دوم) ناسیونالیسم تحت ستم نداریم!، باخ اورادا.

 

ایشیق سؤنمز، 12.02.2014