🔎 سورقو: 13 سایی اوزره نه دئمک ایستردینیز؟
🎤 جاواب: سایلار اوزره معده گوجو دوشونمکلر، سایلار (عددلر) اوزره مثبت و منفی آنلاییش اورتایا قویماقلار انسانلیق تاریخینده حیاتا کئچمیش و مختلیف توپلوملاردا بیر اینانج کیمی قالیبلشمیش بیچیم و شکیل آلمیشلار. 13-و گئنَل و عموم انسانلیغین روحیه احوالی ایله اَلَه آلارساق، اورتایا قویاجاغیمیز دوشونجه-ده اورتاق و مشترک بیر نقطه نی یاخالاماق ایمکانیمیز اولار.
بعضی اینانجلارا گؤره هر ایلین 1، یوخسا اوچ 13 سایینا توش گلن و 13 ایله اوست اوسته دوشن اوستون جومعه گونلری وار. بو جومعه گونلری، 13 دئیه قلمه آلینارلار. بئله بیر دوشونجه یه وارماغین هارادان ایلری گلمه سی بللی دئییل. غرب آراشدیرماچیلاری اؤز ساییملاریندان و آمارلاریندان اَلَه گتیردیکلری آیرینتیلاری (جزئیاتلاری) قارشیلاشدیراراق ایلگینج فاکتلار اورتایا قویموشلار. قومارچیلار (قماربازلار) دا قومار اوینارکن 13-و سئچمکدن بویون قاچیردیقلاری ادعا اولونار. قومارچیلارین بعضی سی جومعه گونو، اون اوچونجو جومعه ماهیتی داشییار و بدبختلیگه یول آچابیلر دئیه قومار اویناماقدان یایینارمیشلار. بوگون ایسه بو آنلاییش ترسینه اولموش، بخت بلیطی اوینایانلارین بیر چوخو جومعه گونونده، اون اوچونده قومار اویناماغا چالیشدیغی دا گلمیش ساییملار و آمارلار آراسیندا گؤرونمکده-دیر.
13 خوشبختلیک سایی
1. اورتاچاغدا کیلیسانین قودرتی دارتیشیلمازمیش (بلامنازع ایمیش). بئله لیکله کیلیسا انسانلارین یاشامینی بلیرلرمیش. هر بیر صومعه قورماق اوچون 12 راهیب و بیر باش راهیبین واجیب اولدوغو اوچون او زامانلار 13 خوشبختلیک سایی (عددی) ساییلارمیش.
2. چین مملکتینده ده 13 خوشبختلیک سایی دئیه قلمه آلینار.
3. قدیم انسانیت تاریخینده ده 13 مثبت ساییلارمیش. قدیم داش زامانینا عایید اولان تاپیلیشلار دا بو دئدیگیمیز گؤروشو اثبات ائدر. اولیه انسانلار اؤز زامانلارینی آی آیلاری (قمری آیلار) کؤمگی ایله عیارلارمیشلار. هر ایل 364 گون؛ گئنه ده هر ایل 13 آی و ائله جه ده هر آی 28 گون ساییلارمیش.
4. قدیم ایسکاندیناوی عادت و عنعنه سینه گؤره اون اوچونجو جومعه شانلی و خوشبختلیک گونو ساییلارمیش. جومعه گونو دوغورقانلیق تانریسی فرئیا آدی ایله تانینمیش و 13 خوشبختلیک سایی دئیه قبول اولونارمیش.
5. قدیم ژئرمنلر اوچون ده 13 خوشبختلیک سایی قبول اولونارمیش. افسانه یه گؤره 12 ملت وکیلی فریزه قانونلارینی اعلان ائتمک اوچون دنیزه گتئمیشلر. اورادا بیر آغیر فیرتینا و طوفان ایله اوزلشمیشلر. بو چتین دوروم و وضعیتده 13-اونجو بیر شخص اونلارین یانینا گلمیش، اونلارین میندیکلری گمینی سویا باتماقدان قورتاراراق سویون قیراغینا (ساحیله) سورموش، سونوندا اونلارا لئکس فریزیون کلمه سینی دیکته ائتمیش و گؤزدن ایتمیش (غایب اولموش).
6. یهودیت جومعه گونونه اؤنم وئرر، 13 سایی دا الله آدی ایله ایلگیده و ایلیشگیده اولدوغو اوچون بیر خوشبختلیک سایی دئیه قبول ائدیلر، بئله لیکله الله-ا 13 صفت نسبت وئریلر. عالیم مایمونیدئس 13 اصول (ایقاریم) دئیه یهودیت اوچون بیر کتابچا یازمیش. یهودیت مذهبینه گنجلرین داخیل اولماسی اوچون ده 13 یاشیندا اولماقلاری شرط ساییلار.
7. آوروپانین بیر چوخ مملکتلرینده کئچمیشدن بیر خرافی اینانج اولاراق 13-اونجو معاش دئیه بیر آی حقوق ایلین سونوندا ایشچیلره اکرام ائدیلر (دئمک، ایل 12 آی اولماسینا باخمایاراق بیر آی حقوق بعضی ایش یئرلرینده ایشچیلره آرتیق وئریلر).
13 بدبختلیک سایی
8. مسیحیت دونیاسیندا 13 بدبختلیک سایی دئیه قلمه آلینار. انجیل کتابیندا عیسی مسیحین حواریون دئیه 12 یانچیسی و طرفداری وار. عیسی مسیح سون شامینی بیر جومعه نین آخشامی یئرکن اونلا بیرلیکده 13 نفر اوتورورموشلار. بو 13 نفرین اون ایکی نفری حواریون قلمه آلینارکن بیر نفری (اون اوچونجو نفر) خائن بیر یهودی دئیه قلمه آلینار! عیسی مسیح ده آدی کئچن جومعه (Karlfreitag) گونونده دارا چکیلمیش. بئله لیکله جومعه گونو پیس خبر وئرن بیر گون دئیه مسیحیت تاریخینه داخیل ائدیلمیش. مسیحیت اینانجینا گؤره آدم و حوا دا بیر جومعه گونو یاساق اولونموش آلمانی یئمک ایله بهشتدن ائشیگه سالینمیشلار.
9. تاروت اویون کارتلاری ایچریسینده اؤلومو ("لا مورت") نماینده لیک سای، 13 دئیه قبول اولموش.
10. فرانسه-ده دوقوزونجو عصرده مسلک بیلدیرن اون دؤردونجو („Quatorzième“) سای وار ایمیش. اون دؤردونجو سایدان منظور بللی و بلیرگین قوناق اولارمیش. او دا اون اوچ قوناق یئمگه اوتورمالی اولارکن بیری چاغیریلارمیش. بئله لیکله اون اوچونجو سایدان اوزاقلاشماغا چالیشارمیشلار (پیس شانسیلیق و اؤلوم بیلدیرن سای و شراییطدن خلاص اولماغا چالیشارمیشلار).
11. شیعه لیکده ده 13 نحس دئیه قبول اولونار. ایراندا فارس دیلی و مدنیتینی اساس گؤتورموش رضا شاه حاکیمیتی ایش اوسته گلدیکدن سونرا اورتایا سورولموش "سیزده بدر" آنلاییشی نین کؤکلری ده شیعه لیکدکی 12 اماملیق آنلاییشینا اساسلانار. بیلیندیگی کیمی عوام انسانلار بیله بیر شئی سایارکن "12 دیر، 13 دئییل" دئیه سایماغا داوام ائدرلر (بو مسئله پول سایماقدا داها دا یایقین ساییلار). امام علی و امام حسین نین سیاست ایله مشغول اولدوقلارینی قیراغا قویارساق، شیعه سیاسی بیر مذهب اولماسینا باخمایاراق او بیری اماملارلار سیاست ایله فعال مشغول اولمامیشلار. آنجاق انقلاب اسلامیدان سونرا "امام" لقبی و عنوانی نین "آیت الله خمینی" اوچون ندن قبول اولدوغو دا بللی دئییل. بلکه ده فارسلیق اساسیندا اولوشموش "منور و روشنفکر!!" محفللرین بو گلیشمه بیر سیاسی اویونو دئیه "امام" و "معصوم" ایفاده سی بوگونکو سیاسی ساحه یه یوکسلمیش و بیر یئنی آنلاییش اولاراق اورتایا قویولموش. بئله لیکله آیت الله خمینی لوفئل لوشاتودا ابراهیم یزدی واسیطه سی ایله پاریسده کی آمریکا سفیرلیگی ایله ایرانا گئری دؤنمک اوچون سیاسی و دیپلوماتیک ایلیشگیلر قورارکن ایرانداکی عوام خالقا آیت الله خمینی نین عکسی نین آی کوره سینده تجسم اولدوغو ادعا ائتمیشلر و خالق کوتله سی تحمیق ائدیلمیش. دئمک، امام جمعه لره وئریلمیش آددان فرقلی اولاراق بیر سیاسی فیقورا "امام" لقبی نین وئریلمه سی شیعه لیکده کی کئچمیش سنتی سیندیرماق و 12 امام ایله دوردوررولموش لقبی بیر داها سیاسی ساحه یه یوکسلتمک مقامینا خدمت ائدر. بو آنلاییش لبناندا ایتکین دوشموش "موسی صدر" اوچون ده کئچرلی ساییلار.
12. فرانسه-ده قبول اولموش خرافاتین علیهینه بیر جاواب اولاراق آمریکانین نیویورک شهرینده 1880 اینجی ایل بیر جومعه گونونده بیر 13 نفرلیک بیر کلوپ یارانمیش. بو بؤلوک و قوروپ هر آیین اون اوچونده بیر آرایا گله رک بیرلیکده آخشام یئمکلری یئمیشلر. بیر ایلدن سونرا اونلار 13 سایی علیهینه اولان دوشونجه نین خرافات اولدوغونو و هر بیری ساغلام یاشاییشلارینا داوام ائتدیکلرینی بیلدیرمیشلر.
13. یونان توپلوموندا دا تریسکایدئفوبی (اون اوچونجوندن قورخما) دئیه بیر آنلاییش وار. بو دوشونجه یه اساسا بعضیلری 13 و بو سای ایله ایلگی و علاقه-ده اولان شئیلردن قورخارلار. بو دوشونجه یه اساسا 13 قاتلی بیر تیکینتی (بنا) تیکیلمز. اوچاقلاردا صندلی سیراسی نین اون اوچونجوسونده اوتورولماز. قوناقلیقلارا (هتللره)، سایریلیقلارا (خسته خانالارا، بیماریستانلارا) 13 سایی (شماره پلاک) تیکینتی و بینالارا وئریلمز.
دونیادا خرافات
کریستوف کولومپ، ناپلئون بوناپارت، مارک توَین، فرانکلین د. روزوئلت و وینستون چئرچیل تانینمیش انسانلاردان ساییلاراق خرافی دوشونجه لی انسان اولموشلار. چئرچیل اوچاغین (هواپیمانین) و تئاتئرین 13-اونجو صندلی سیراسیندا اوتورماقدان قورخارمیش.
لاتین آمریکانین بعضی مملکتلرینده، اسپانیادا، یوناندا 13 بیر نحس سایی اولارکن جومعه گونو دئییل، چرشنبه آخشامی بیر نحس گون ساییلار. گونئی آذربایجان نین بیر چوخ یئرلرینده بازار ائرتَسی گونو (دو شنبه "بد نماد") دئیه پیس ساییلار. شنبه گونونده باشلامیش ایشین عؤمورو ده اوزون سورمز دئیه انسانلار چرشنبه آخشامی و جومعه آخشامی بیر چوخ خئیر ایشلرینی گؤررلر.
ایشیق سؤنمز، 08.04.2019