گونتای جوانشیرین فارس نئهیلیست گؤروشلری اوزره باخیش

 

 

🔎🔹 سورقو: گونتای جاوانشیر دانیشیغیندا دئییر: - "فداکار انسانلارین حرکتی ایله اجتماعی مسئله لر  چؤزولمز. من بو کتابلاری یازدیم کی هئچکس موباریزه یه قاتیلماسین، سیستیم علیهینه موبارزه ائتمه سن، (چونکو) سیستیم گوجله نر.... هئچ بیر موباریزه یه قاتیلماق لازیم دئییل.... ملتین خوشبختلیگی اوچون موبارزه یه قاتیلیرام دئمک آخماقلیقدیر. (سیزجه) بو قدر آخماقلیق اولار می؟.... کوردلرین و آذربایجانلیلارین تشکیلات یاراتماقلاری و تشکیلات قورماقلاری جمهوی ایسلامی نین عؤمورونو اوزادار"[1]. بو دوغرولتودا نه دئمک، ایستردینیز؟

 

🔎🔹جاواب: گونتای بگ،  مسئله نی دوزگون اورتایا قویا بیلسه ایدی، آذربایجان تورکلوگونون ملی مسئله سینه دوزگون یاناشاردی. دئمک، کئچمیشده  آذربایجان تورکلوگو ائلیتی نین ائتدیگی خطالاری اله آلاراق اونلاری دوزگون ایرده لمگه، تجزیه و تحلیل ائتمگه زامان آییرابیلسه ایدی، فارس نئهیلیستیگی مفکوره سیندن اوزاق دورماغا چالیشاردی. بئله لیکله  فداکار انسانلارا بئله سایقیسیز یاناشمازدی. انسان اؤز عؤمرونو توتساقدا کئچیررکن اؤزونو ارضاء ائتمگه چالیشمیش دئییل، عقیده صاحابی و وجدان بورجونا یاخالانمیش بیر مقصر دئیه توتساق ائدیلر. دئمک، گونتای بگ مسئله نی  دوزگون اورتایا قویمادیغی و حاکیم دیل و مدنیت صاحابلاری نین حاکیم کسیمی نین گؤزو ایله مسئله یه یاناشدیغی اوچون آلمیش نتیجه لرده فارسلیق دوغرولتوسوندا اورتایا چیخار.

 

✅ دئمک، بوگون آذربایجان مشروطه حرکاتی تاریخینه باخدیقدا کئچمیشده خطالاری و گوناهی ستارخان نین و باقیرخان نین اوزرینه یوکلمک هئچ نه اورتایا قویماماغین یانی سیرا انسانلاریمیزی، فارس نئهیلیستلیگی نین قوجاغینا آتیلمالارینا خدمت ائده بیله جک بیر باخیش یوخسا سفاریشنامه ساییلار. بو باخیش قاجار شاهلیغی زامانینداکی حاکیم سیستیمین اسلام اومتچیلیگیندن فارس دؤلتچیلیک مفکوره سینه قایماسی نین اوستونه اؤرتو چکه رک "ایرانیت" دئیه فارس ایستعمارچیلیق مفکوره سینه خدمت ائدر. بو گؤروش بلکه ده بیلمدن هیندوستاندان فارسلیق اوچون گتیریلمیش "دبستان المذاهب و دساتیر" آدلی یالان تاریخی داستانلار و روایتلرین میرزه فتحعلی آخوندزاده، جلال الدین میرزه و میرزه یوسفخان تبریزلیلری ده دوشونجه و فیکیر باتلاغینا یووارلاندیقلاری نین اوستونو اؤرتر؛ اوسته لیک "ایران دؤلتی ملتی" دئیه فارس دؤلتی یاراتماق دوشونجه لرینی کؤلگه آلتیندا توتاراق انسانلاریمیزی تاریخده اولدوغو کیمی فارسلیق اسارتینده ساخلاماغا و دوزگون دوشونمکدن و فیکیرلشمکدن اوزاق توتماغا خدمت ائدر.

 

✅ بوگون کئچمیشه دوغرو باخدیقدا ایران ممالیکی محروسه سینده کی تورک شاهلیغی و ائلیتی یازیلی تورک دیلی بیلینجیندن یوخسول اولدوقلاری اوچون اونلار زامانلا اؤز تورکلوکلرینی (دیل و مدنیتلرینی) آیاقلاشدیرابیلمدیکلری اوچون اؤز اللری ایله اؤزلرینی فارسلیق توزاغینا و تله سینه سالمیشلار. دئمک، دیل و مدنیت اساسلی هر هانکی بیر سیاسی و اجتماعی سیستیمین یارانماسینا دوشونجه و فیکیر حاضیرلیغی یئریتمک و انسانلاری؛ هرکسین اؤز باشاریغی و یئتنگی ایله بیرلیکده اؤز دیلی و مدنیتینی (تورکچه نی) اساس گؤتوره رک  حرکته کئچمه سی و اویقون زاماندا ملی ایراده نی اورتایا قویماغا دوشونمه سی واجیب مسئله لریمیزدن بیری ساییلار.

 

✅ بو آردا ایچریده آذربایجان ملی فعاللاری نین بیر چوخونون توتولماسی، ایش و گوجلریندن اولماسی اونلارین یانلیش حرکتلری نین نتیجه سی دئیه مسئله نی اورتایا قویماق دا انصافسیزلیق ساییلار. دئمک، هئچ بیر آذربایجان ملی و مدنی فعالی سیلاحلی بیر حرکته قاتیلمیش و وار اولان نظام و انتظامی تهدید ائتمیش دئییل، ساده جه بیر مدنی انسان اولاراق اؤز دیل بیلینجی و شعورونو سرگیلمیش ذاتلار اولموشلار. دئمک، فارسلیق اساسیندا اداره اولونان تهران حؤکومتی نین باشقا دیل و مدنیت صاحابلاری نین اؤز دیل و مدنیتلری اساسیندا وارلیقلارینی اورتایا قویماسینا تحمل ائتمدیگینی بو انسانلارین اوستونه ییخماق، اونلاری دیل بیلینجی و دیل شعورونا  سؤیکندیکلری اوچون "آخماق و آوانتاریست" قلمه آلماق سؤز صاحابی نین فارس نئهیلیستلیگی باتلاغیندان اؤزونو قیراغا چکه بیلمدیگیندن حئکایت ائدر.

 

 

ایشیق سؤنمز، 31.07.2019


 

[1]              گونتای بگین تلگرامداکی داشیغی سس فایلی اولاراق عمومی قوروپلارا پایلاشدیغی اوچون، بیزده اونون سس فایلی سند اولاراق وار.