راه کارگر و آذربایجان میللت مسئله سی!
کئچمیش سویتلر بیرلیگینده نسبی دیل و مدنیت آزادلیغینا باخمارایاق بؤیوک اؤلچوده روس دیل و مدنیتی اؤزونو سؤیتلر بیرلیگینده روس اولمایان سؤیتلر بیرلیگی وطنداشلارینا بیر چوخ لحاظدان تحمیل ائدیردی. بئله لیکله حاکیم وضعیت روس دیلینی سیاست و ایداره ائدیجی حاکیمت دیلی اولاراق روس اولمایان میللتره بیر ایستعمارچی دیل کیمی یوکله ییردی. بو تحمیل ائتمه نین آدینی اینسان و میللتلرین حقوق برابرلیگینی قبول ائدنلر نه قویا بیلر دئیه دوشونمه لی ییک (ایدئولوژو حاکیم دیل و مدنیته بیر وسیله اولموشدور مو؟، آددا کومونیست مملکتی دئیه روس اولمایان اینسان و میللتلره روس دیلی بیر اوممتچیلیک وسیله سی دکی تحمیل اولورموش مو؟). دئمک اینسانیت و حقوق برابرلیگیندن فارس سول تشکیلاتلاریندا دورمادان دم ووران، اؤز دیل و مدنیتلری دگیل، فارس دیل و ادبیاتینا خیدمت ائتمکه گه چالیشان زواللی تورک، کورد، عرب، بلوچ، تورکمن و ساییره لر اوچون فارس کیملیگینی اؤز دیل و مدنیتلرینه اوستون گؤرمکلریندن ایلری گلیرمی، یوخسا بیر دب اولاراق رضا شاه زامانیندان قاپی فارس دیل و مدنیتی اوزرینده فیرلانمالیدیر دئیه اینسان حقوق برابرلیگینه احترام قویماغی لازیم گؤرمه دیکلری اوچون فارس دیل و مدنیت ایستعمارینی تقویت ائتمک ایستیرلر می؟ بیلیندیگی کیمی بو سولچو حضراتلار صینیف مجالیله سی وئریریک دئیه باشقا فارس ساغچی و اومتچی تشکیلاتلار دکی اؤز دیل و مدنیتلرینه اؤزنمک (دیققت یئتیرمک) یئرینه بو گون ایراندا دیل و مدنیت باخیمیندان شوونیست و ایستعمارچی دورومدا اولان فارس دیل و مدنیتینه دورمادان قلم ووراراق، ایجتماعیته ده دئمه سه لر ده بو دیل و مدنیتی اؤز دیل و مدنیتلرینه اوستون گؤرورلر( بلکه ده ایدئولوزی یایما باخیمیندان ایران ممالیکی محروسه سینده کی باشقا دیللر ایله مقایسه ده فارس دیلینین شانسینی داها آرتیق گؤرورلر می؟ و یا ایدئولوژی باخیمیندان گله جکده حاکیمیت ائده جک دایره لرینی روسیه ده کمونیست پارتیسی چار حکومتینین یئرینه اوتوردوغو کیمی تهراندا حاکیم اولان نیظام و اینتظام یئرینه اوتورماق و ایران ممالیکی محروسه ده کی فارس اولمایان میللتلری فارس دیل و مدنیتی ایستعماری دایره سی آلتیندا ساخلاماق ایستیرلر می؟ دئمک، ایدئولوزی هر نه دن اوستون توتولور). کیم بیلیر؟ بلکه ده اؤزلرینی آیدین گؤسترمگه چالیشمالارینا باخمایاراق ایرانچیلیق و باستانگرایلیق مفکوره سی اسیرلیگیندن اؤزلرینی قورتارا بیلمیرلر. بو احتماللارا فیکیر زمینه سی یارادان بو حضرتلرین اؤز دیل و مدنیتلرینه اهمیت وئرمه دیگلریدیر. بونلارین بیر چوخو فارس تشکیلاتی یولداشلارینین احترامینا اوشاقلارینا آنا دیللرینی ده اؤیرتمه میشلر. سوروشدوقدا ندن اؤز دیل و مدنیتینیزه دیققت یئتیرمک ایستمیرسینیز؟ دیل بیر ایرتیباط عامیلیدیر دئیه جاواب وئریرلر. دئمک، دیلی ایرتیباط عامیلی کیمی گؤرنلر نه اوچون بو ایرتیباط و رابیطه نی، ایکی طرفلی و متقابیل حیاته کئچیرمک و قارشی طرفدن ده ائتدیکلری عمللره متقابیل گؤزلنتی لری اولمور(بو قابیلیت اونلارین دونیاداکی اینسانلاری ایشچی و اکینچی گؤرمک ایستدیکلریندن ایلری گلیرمی، یوخسا میللی حاقلارین آلینماسینی، او جومله دن دیل و مدنیتین قورونماسینی کومونیست ایدئولوزیسی نین علیهینه تشخیص وئره رک بو مقوله میللتچیلیک مقوله سینه عاییددیر دئیه عوامفریبلیک ائدیرلر می؟ بیلیندیگی کیمی میللی دیرلره حاکیم اولمایان میللت اوولادلارینا میللیتچیلیک آدی قویماق گولونجدور. بونلار یالنیز میللی بیلینج و شعورا صاحیب اینسانلار ساییلمالیدیرلار. بو ایشچی صینیفیندن دم ووران حضراتلارین مرکز کومیته لری و رسمی رابیطلری آذربایجان، کوردوستان، بلوچیستان، تورکمنیستان، لوریستان و خوزیستان و ساییره کندلیسی و ایشچیلری ایله هانکی دیل ایله رابیطه قورموش و قورورلار؟ بو تشکیلاتلارین سیجیللرینه (یایین و باسین اورقانلارینا) باخدیقدا بونلارین هامیسی فارس تشکیلاتلاریدیر. دئمک بو فارس تشکیلاتلاریندا هر بیر شخص اؤزونو باشقا بیر شخص ایله برابر گؤرمک ایسته گینه باخمایاراق بو تشکیلاتلاردا داروینین دئدیگی کیمی اینسانلیق باخیمیندان تکمیللشمه سوره جی (پروسسی) گئدیر:
1) - فارس اولان عوضو. بو شخصلر اؤزلرینی فارس وایران تمامیتچی سی تانیدیقلاری اوچون ایدئولوزینی ده اؤزلری اوچون بیر باش قاتما وسیله سی کیمی دوشونورلر. دونیا گؤروشوندن آسیلی اولمایاراق یئری گلدیکده فارس دیل و مدنیتینی ایران ممالیکی محروسه سینده حاکیمیتده ساخلاماق اوچون اولمازین حرکتینه قول چکه بیلرلر(یوگوسلاوی ده میلوسوویچ لر و ژنراللاری دکی)
2) فارس اولمایان عوضولر. بونلار ایلاهی دینلرده وعده اولونموش مهدی نی (مهدی موعودو) گؤزله ین مؤمونلر دکی کیملیکلرینه و کیم اولدوقلارینا فیکیر وئرمه دن اؤز آرمانلاری یولوندا مبارزه ائدیریلر و اینتظار چکدیکلری نیظام و اینتظامی گؤزله یرک بیر مسلک قولو دکی توتولدوقلاری ایستعمارچیلیق دیل و مدنیتی ایله اؤز دیل و مدنیتلرینین فرقینه وارماق ایستمه یرک گون کئچیرمک مجبوریتینده اولورلار. بونلار توتولدوقلاری دیل و مدنیت ایستعمارینی اؤزلرینه رسمی قبول ائتدیکلری اوچون سای باخیمیندان ایران ممالیکی محروسه سینده کی فارس اولمایان میللتلره منسوب اولمالارینا باخمایاراق، دیل و مدنیت باخیمیندان اؤزلرینی فارس ایستعمارچیلیق توتساغیندان قورتاران گونه دک فارس تشکیلاتلاریندا اورادا توتدوقلاری پست و مقامدان آسیلی اولمایاراق یتنکلی و یتنکسیز (الیندن بیر ایش گلن و الیندن هئچ ایش گلمین) قول ساییلیرلار.
بو اوستکی سایدیقلاریمیزی نظره آلاراق » سازمان راه کارگر ایران« آدلی فارس تشکیلاتی نین »آذربایجان فئدرال تشکیلاتی« آدیندا یئنی قورولموش بیر تشکیلاتا گؤستردیگی مناسبتین بعضی پاساژلارینی آذربایجان میللت مسئله سی اوچون اویقون حئساب ائدیریک، اوخویوروق:
"ما هرگز نمی توانیم این حقیقت بدیهی را نادیده بگیریم که کارگران و زحمتکشان هر ملیتی قاعدتا" وغاالبا" در ارتباط مستقیم با بهره کشان "خودی" مورد بهره کشی قرار می گیرند."(1)
اوسته گؤروندوگو کیمی بورادا راه کارگر کیلیشه اولموش فورموللاری ایران ممالیکی محروسه سیندکی میللتلر اوچون ده اویقولاماغا چالیشیر. دئمک، ایران ممالیکی محروسه سینده کی آذربایجانلی شخصلرین وارلی اولماسی، آذربایجان میللی بورژوازی دگیل، ائله او قوندارما آددا ایفاده ایدیلن ایران بورژوازیسی (اوخو: زامان گئدیشی ایله اونلارین فارسلاشماسی نتیجه سینده فارس بورژوازیسی) عنوانیندا دیرلندیرمه لیدیر. بیلیندیگی کیمی آمریکا بیرلشمیش شتاتلاریندان 20 نئچه تلویزیون کانالی واسیطه سی ایله ایرانا فارسی پروقرام گؤنده ریلیر. بونلارین ایسپونسورلارینین بیر چوخو آذربایجانلی اولمالارینا باخمایاراق بو تئلویزیون پروقراملارینین هامیسی فارس دیلینده دیر. دئمک، فیکیر باخیمیندان حاکیم فارس دیل و مدنیته عایید تشکیلاتلار طرفیندن یؤنلندیریلمیش بو حضراتلارا بوگونکو دوردوقلاری دوراجاقلارینا گؤره آذربایجان بورژوازیسی دئمک گولونج ساییلمالیدیر.حتی راه کارگر ایران ایچریسینده فارس دیل و مدنیتینه دورمادان یونقار اولان آذربایجانلیلارا دا آذربایجان سولچوسودئمک اولماز. بو جهتدن یانا دا:
1- ایرانداکی فارس دیل و مدنیتی آلتیندا فورمالاشمیش بوتون قوروم و تشکیلاتلار فارس تشکیلاتلاریدیر.
2 - بو حیقارتی اؤزلرینه سیغیشدیرمایان آذربایجان وارلیسی آذربایجانا یؤنه لیک سرمایه یاتیرمالی و آذربایجان میللی قوروملارینین و تئلویزیونللارینین آچیلماسینا کؤمک ائتملیدیر.
3- بو حیقارتی اؤزلرینه سیغیشدیرمایان آذربایجان آیدینی و سولچوسو دونیا گؤروشوندن آسیلی اولمایاراق آذربایجان دیل و مدنیتی اساسیندا اؤز میللی و سیاسی تشکیلاتلارینی یاراتمالیدیرلار.
دئمک، ایران ممالیکی محروسه سی کثیر المیلله اولماسینا باخمایاراق دیل، مدنیت و سرمایه قویولما، ایداره ائتمه و سرمایه نی یؤنلندیرمه باخیمیندان مرکزیتچی فارس حاکیمیتی نین ایختیاریندادیر. آذربایجان اکینچیلیگینی، مالدارلیغینی و بیر سؤز ایله دئسک ایقتصادینی فلج ائتمک، آذربایجان کندلیسی نی تهران کوچه لرینده سوپور دورومونا دوشورمک فارس ایستعمارچی و شوونیست حاکیمتی نین ایستکلریندن اولموش. دئمک، ایستعمار ایشغالی آلتیندا اولان مملکتین وارلی، یوخسولو، اکینچی بیچینچی سی گؤز آردی ائدیلمدن ایتعمارچی قووه لرین واینحیصاریندا سومورولمکده دیر. گؤروندوگو کیمی فارس تشکیلاتی راه کارگر ایران و آشاغیدا گؤره جگیمیز کیمی ایران ممالیکی محروسه سینین کثیر المیلله اولدوغونو سؤز ده قبول ائتمه سینه باخمایاراق عملده ایران ممالیکی محروسه سینده هانکی دیل و مدنیتین حاکیم اولدوغو و زامان گئدیشی ایله بو ممالیکی محروسه بؤیوک دییشیمه اوغرامازسا، بو میللتلرین وارلیغی هانکی ایستعمارچی میللتین ایختیارینا کئچمه سی نی درک ائده بیلمیر، یا دا باشقا فارس تشکیلاتلاری دکی تشکیلات و دونیا گؤروشلرینه اویقون گؤرمدیکلری اوچون مسئله نی گؤرمزدن گلیر. گئنه ده اوخویوروق:
"٣- از نظر «راه کارگر» پیکار برای آزادی و برابری همه انسان‌ها و حق شهروندی برابر همه ایرانیان جزئی جدائی ناپذیر از پیکار برای سوسیالیسم محسوب می شود و فراتر از این، تنها در متن پیکار برای سوسیالیسم است که امکانات واقعی برای دست یابی به این آزادی و برابری عمومی و اعمال حق شهروندی برابر به وجود می آید. با این نگرش است که ما دفاع از برابری حقوق همه ملیت های ایران و حق تعیین سرنوشت آن‌ها را وظیفه تعطیل ناپذیر خود می دانیم."(1)
اوسته گؤروندوگو کیمی فارس تشکیلاتی اولان راه کارگر کیلیشه دئییملری بیر بیرینین آردینجا سیرالاماقلا بیر یاندن ایران ممالکی محروسه سینده کی میللتلر مسئله سینی ایرانلیلیق و شهروندلیک حددینه دوشورور، باشقا یاندان سولچولوق مکتبینده بیر شعار کیمی تانینان و فارس تشکیلاتلاری واسیطه سی ایله 80 ایل ایران ممالیکی محروسه سینده کی میللتلره نه اولدوغونو آچیقلاماق ایستمه دیکلری »حق تعیین سرنوشت ملتها« شعارینی وئرمگه چالیشیر. گئنه ده اوخویوروق: » - از نظر « را ه کارگر» پذیرفته شدن قطعی حق تعیین سرنوشت ملیت های ایران و حق آن‌ها در خواندن و نوشتن و آموزش زبان مادری خودشان و حفظ و شکوفائی ویژگی های فرهنگی شان، از لوازم حیاتی پاگرفتن دمکراسی، آزادی های بنیادی و حق شهروندی برابر در کشور چندملیتی ماست.«
اوسته گؤروندوگو کیمی گئنه ده بیر یاندان میللتلره اؤز موقدراتینی اؤزلری بلیرله مک ایمکانی تانیریق دئین راه کارگر جومله سونا چاتمادان بو حقی اونلارا اؤز دیللرینده یازیب اوخوماق و شهروندلیک مقوله سی ایله قیسیتلاماغا چالیشیر. گئنه ده اوخویوروق:
"پذیرش حق تعیین سرنوشت ملیت‌های از جمله حق جدائی آن‌ها، به معنای دامن زدن به جدائی طلبی یا بی اعتنائی به سرنوشت ایران نیست. بلکه مطمئن ترین راه تحکیم هم بستگی اقوام و ملیت های ایران و دفاع از موجودیت آن است. زیرا تنها از این طریق است که همه ملیت‌ها و ایران می توانند به حق برابر دست یابند وهمه ایرانیان با برخورداری از دمکراسی و آزادی‌های سیاسی و مدنی، به مدافعان فعال حق حاکمیت خودشان وموجودیت کشورشان تبدیل شوند."(1)
اوسته گؤروندوگو کیمی اؤزلری بیان ائتدیکلری ایفاده نی آردی کسیلمه دن باشقاسی اونا بیر نکته آرتیرار دئیه چئنه مه گه چالیشیرلار. دئمک راه کارگرین اؤز گله جکلرینی میللتلر اؤزلری بلیرلمه لی دئمه سی، راه کارگر ایران ممالیکی محروسه سینین تورپاق بوتونلوگونه قارشین عتیناسیزقالاجاق ماهیتی داشیمامالیدیر( اوخو : راه کارگر ده حزب توده ایران دکی تمامیت ارضی طرفداریدیر. بونو حزب توده آچیقجاسینا دییر. راه کارگر، لنین 1918 چار حکومتینه قارشین آذربایجان جومهوریتینین ایستیقلالینی تبریک دئمه سی و 1920 ده آذربایجان جومهوریتی نین قیزیل اوردو طرفیندن ایشغال اولونماسی و باسیلماسینی تبریکله دیگی کیمی، شیادلیق ماهیتینده حرکت ائدیر).
قایناق:
1 اعلامیه کمیته مرکزی سازمان کارگران انقلابی ایران (راه کارگر) : در باریه جنبش دمکرات فدرال آذربایجان: http://www.iran-chabar.de/1383/09/23/001.htm
ایشیق سؤنمز 12.12.2004