پان ایرانیستلرین دیل و مدنیت تحریف ائتمه مسئله لری!

 

بیلیندیگی کیمی 1925 اینجی ایلدن، رضا میرپنجین اینگیلیسلر واسیطه سی ایله ایران ممالیکی محروسه سینده ایش باشینا گتیریلمه سیندن باشلابایاراق کیچیک سایدا باستان گرای کیمی تانینان پان ایرانیستلر ایران ممالیکی محروسه ده کی دیل و مدنیتلری فارس دیل و مدنیتی نین آلت قورپو کیمی تانیملاماغا (تعریفلمه گه) باشلامیشلار. بونلارین بیر سیراسی شاه واه ایله لوس آنجلئس، آمریکا بیرلشمیش شتاتلارینا قاچمالارینا باخمایاراق بیر سیراسی هشترخان تویوقلاری کیمی دون دییشه رک ایسلام آدی آلتیندا فارس سیستیمی ایداره لرینه و اورگانلارینا سوخولاراق ایسلام و ایسلامیت آدی آلتیندا اؤز نژادپرستلیک و راسیستلیک فیکیرلرینی حیاتا کئچیرمه گه چالیشمیشلار. بونلار ادبی ژورنال آدینا اؤز کؤهنه مریضلیکلرینه دون گئیدیره رک ایسلامیت آدی آلتیندا فارس اولمایان دیل و مدنیتلر ایله اؤز دوشمنلیکلرینی داوام ائتمه گه چالیشمیشلار. بیلیندیگی کیمی جواد شیخ الاسلامی عربلری فارس دیل و مدنیتینده اریتمک اوچون، عربلرین خوزیستان شهرلرینی ترک ائتدیکلری و فارس شهرلرینه آخین ائتدیکلرینی ایران و عراق آراسیندا باشلانمیش 8 ایللیک ساواشی عرب میللی مسئله سینی ایران ممالیکی محروسه سی گؤنده لیگیندن سیلدیک دئیه بو ساواشی بؤیوک نعمت حئساب ائدیردی. بیر چوخلاری بو مسئله نی کئچمیش حئساب ائتمکلرینه باخمایاراق بوگون پان ایرانیست قوروپلارین ایسلام دینی آلتیندا آچیقجا نژادپرستلیک ائتدیکلری نین شاهیدی اولوروق. بو ذات عالیلردن بیری ده "ایران مهر" ژورنالی ایله دانیشیق ائدن فاروق صفی زاده آدلی معلوم الحال حضرتلریدیر[1]. بیلیندیگی کیمی پان ایرانیستلر اؤزلرینی ایران ممالیکی محروسه سی نین اصل صاحیبلری، باشقا دیل و مدنیتلری بو ممالیکی محروسه اوچون اؤزگه (بیگانه) حئساب ائتدیکلری اوچون ایلام، لولوبی، اورارتو و سومر مدنیتلرینی ده تحریف ائتمه گه چالیشمیشلار. اونلار کئچمیشده آوروپاداکی یهود تاریخ ایجماع سی واسیطه سی ایله اونلارا یازیلان اویدورما مطلبلری تاریخ دئیه بیر وحی منزل و قرآن آیه سی کیمی قبول ائتمه لرینه باخمایاراق شاهلیق نیظامی ایران ممالیکی محروسه سینده چؤکدوکدن و یئرینی ایسلام جومهوریسینه وئردیکدن سونرا بو ممالیکی محروسه ده کی فارس مدنیت تاریخی 2500 دئییل، 7000 ایلدن داها آرتیق تخمین ائدیلمه سیدیر. پان ایرانیستلر، »قاباقدان یاپیش دالدان دوشمه یه سن« سیاستی نی اؤزلری اوچون اولگو (معیار) قبول ائده رک یاخین کئچمیش گونلرده  ناصیر پورپیرارین 1200 ایل دورقونلوق (12 قرن سکوت) کتابلارینی یازدیغی اوچون  اونو کیتابلاری ایله بیرلیکده یاندیرماغا چالیشدیقلارینا باخمایاراق بوگون ایران ممالیکی محروسه سینده تاپیلمیش فارس کیملیگینه عایید اولمایان آرخولوژی تاپینتیلاری ایران آدینا دونیا ایجتماعیتینه سرگیلنمه گه باشلادیقدان سونرا فارس شوونیستلری بو یول بو ممالیکی محروسه نین قدیم تاریخینی ده اؤزلری اوچون چیخماغا چالیشاراق کئچمیش یهود تاریخ ایجماع سی الیندن قاپدیقلاری چؤره گه تپیک آتماغا و اوزاق کئچمیشه عایید اولان قدیم تاریخی (هخامنشلردن اؤنجه کی تاریخلری) اؤزلرینه چیخماغا باشلامیشلار. بو آرادا  »ایران مهر« ژورنالی فاروق صفی زاده آدی آلتیندا معلوم الحال بیریسی ایله دانیشیق دئیه او ژورنالدا باستانگرایلیق و پان ایرانیستلیک اساسیندا معده گوجو و هئچ تاریخی قایناق و منبعه اساسلانمادان فیکیرلر اورتایا قویموشدور. پان ایرانیستلرین بو چابالارینا باخمایاراق فارس حاکیمیتی ایران ممالیکی محروسه سینده یالانچی تاریخ اوزره قورولدوغو و باشقا دیل و مدنیتلری داندیغی اوچون اونلار اؤز ایشتیباهلارینی بویونلارینی آلماق یئرینه کئچمیشده کی یالانچی تاریخلرینی بیر داها یالانلاماغا و اونلاری داها قدیم گؤسترمه گه باشلامیشلار. »ایران مهر« ژورنالی نین مسئولو فاروق صفی زاده آدلی کاذیب بیر شخص آدینا اؤز ژورنالیندا بیلیمه دایانمادان یالان معلومات کیمی عوامفریبلیک مقصدی داشییان مطلبلری چاپ ائتمه سی اؤزو ده تعجوب دوغوروجودور. بو مطلبلرین بیلیمه یادانمادیقلارینا باخمایاراق ایجتماعیت اوچون ضررلی اولدوغونو  نظره آلاراق او فیکیرلرین بعضی مقاملاری اوزرینده دایانمانی بیلیم آچیسیندان (زاویه سیندن) دوزگون حئساب ائدیریک.

1- تاریخی موضوعلار

بیرلیکده اوخویوروق:

"..ما تاریخ را در دست داریم، نشان می دهد فقط ساسانیان در ایران دوهزاروپانصد سال حکومت کرده اند و ما قبل از ساسانیان ما اشکانیان را داریم. بعد هخامنشیان را داریم"[2].

اوسته گؤروندوگو کیمی کئچمیش شاه زامانیندا 2500 ایللیک اویدورما فارس شاهلیق(!!!) تاریخی یئنی آرخولوژی تاپینتیلارینا جاواب وئرمه قابیلیتینده اولمادیغی اوچون فارس نژادپرستلری یهودلار الی ایله اویدورما یازیلمیش تاریخلرینی یالانلاماغا و یئنیدن یالانچی ایفاده لر ایجتماعیته سرگیله مه گه  و یئنی تاریخلر یونتاماغا باشلامیشلار.

559-330 ایللری میلاددان اؤنجه هخامنشلر سیلسیله سی بوگونکو ایران ممالیکی محروسه سینده حؤکوم سورورموشلر. مقدونیه لی ایسکندر 330 ایل میلاددان اؤنجه هخامنشلر علیهینه ساواش آچاراق بو سیلسیله نین حاکیمیتینه سون قویموش. 312-301 ایللری میلاددان اؤنجه سورولن ساواشین نتیجه سینده یونان ژنرالی سئلویکوس نئکاتور مقدونیلی ایسکندرین یئرینده حؤکمدار اولاراق حاکیمیتی اله کئچیرمیش. 323-250 ایللری میلاددان اؤنجه سیلوکیلر (یونانلیلار) ایران ممالیکی محروسه سینه حاکیم اولموشلار. 250 ایل میلاددان اؤنجه پارتلاردان ساییلان آرشاک خوراساندا حاکیمیت قورموش. اونون قارداشی تیرداد 247 ایل میلاددان اؤنجه ساواش نتیجه سینده  سیلوکیلر یونانا دوغرو گئری اوتوردوقدان سونرا حاکیمیته گلمیش. تیرداددان سونرا مهردادین حاکیمیته گلمه سی ایله شرقدن تورک خالقلاری نین ایران ممالیکی محروسه سینه آخینی - فارس موألیفلری تورکلرین آدلارینی چکمک ایستمه سه لر ده قلملری نین اوغورلوقجا حرکت ائتمه سیندن آنلاشیلدیغی کیمی- باشلامیش اولور. مغریض موألیفلر تورکلری چینلیلر طرفیندن سیخیشدیریلمیش و ایران ممالیکی محروسه سینه یؤنلمیش کیمی گؤسترمه گه چالیشیرلار. اؤزلری نین دئدیکلرینه گؤره 250 ایل میلاددان اؤنجه آدینی چکمک ایستمه دیکلری تورکلر ایران ممالیکی محروسه سینه گلمیشلر[3] . اشکانلارین حاکیمیتی ایران ممالیکی محروسه سینده 226 ایل میلاددان سونرایادک سورموش (داوام ائتمیش). 226 میلاد ایلینده اردشیربابکان اشکانلارین سون سلاله سیندن اولان 4.اونجو ارودانین حاکیمیتینه سون قویاراق ساسانلار سلاله سی حاکیمیتی نی قورموش و زردوشت آیینی نی اؤز ایمپراتورلوغوندا رسمی ائتمیش.  تاریچیلرین یازدیغینا گؤره ساسانیلر 224-651 ایل میلاد ایللرینده بوگونکو ایران ممالیکی محروسه سینده  حاکیمیت ائتمیشلر[4].

اوسته کی فاکتلاردان گؤروندوگو کیمی هخامنشلر و ساسانیلر توپلام 756 =229+427 ایل کئچمیش ایران ممالیکی محروسه سینه حاکیمیت ائتمیشلر. بو ممالیکی محروسه نین مدنیت تاریخی ایسه 7000 ایلدن آرتیق حئساب ائدیلیر. بونلارین یانی سیرا بو ممالیکی محروسه ده 1000 ایلدن آرتیق تورکلرین حاکیمیت ائتدیکلرینی و فارس مغریض موألیفلری نین دولاییلی دئدیکلرینه اساساً 250 میلاددان اؤنجه تورکلرین ایران ممالیکی محروسه سینه نیظامی یول ایله گله رک و رول اوینادیقلارینی نظره آلارساق، فارسلار یالانچی تاریخلره اساساً اوسته آدی چکیلن هخامنش و ساسانلار سیلسیله سی نین قالیقلاری اولموشسالار دا، فارسلار هئچ ده تورکلردن ایران ممالیکی محروسه سینه دوغما گؤرونه بیلمزلر. تورکلر یونانلیلار علیهینه اوسته آدی چکیلمیش سیلسیله لرین قوشونلاری سیرالاریندا نه قدر ووروشموش، عرب حاکیمتلرینی ایسلام دینی ایران ممالیکی محروسه سینه حاکیم اولدوقدان سونرا بو ممالیکی محروسه دن ائشیگه سالمیش و فارس دیلینی سولطان محمود غزنلی واسیطه سی ایله بو ممالیکی محروسه یه دیوان دیلی ائتمیشلر دئیه کئچمیشلری نظره آلارساق فارس ایجتماعیتی و پان ایرانیستلرین نان کور اولدوقلاری نین شاهیدی اولاریق. گئنه ده اوخویوروق:

"مادها اولین حکومت خودشان را در نه هزارسال پیش بوجود آوردند. بعدها بلافاصله هخامنشیان که جزوی از مادها بودند روی کار آمدند"[5].

بیلیندیگی کیمی فارسلارا یهود تاریخ ایجماسی طرفیندن یازیلان تاریخلره اساساً پارت، پارس و ماد قوملاری بیرلیکده ایران ممالیکی محروسه سینه آخین ائتمیشلر. بونلارا یازیلان تاریخی نظره آلاراق مادلار 9000 ایل اؤنجه کی دؤولتلرینی یئر کوره سی نین هانکی نقطه سینده یاراتدیقلاری بللی اولمادیغینا باخمایاراق ماد آدیندا بیر طایفا 836 ایل میلاددان اؤنجه آوروپالیلارین Mesopotamien دئدیکلری (فارس تاریخچیلری نین  یازدیغینا اساساً همدان اطرافیندا) بیرینجی دفعه اولاراق آدی ائشیدیلمیشدیر. او طایفا کوروش (625-585 میلاددان اؤنجه) باشچیلیغی ایله آشورلارین بابیل آدیندا تانینمیش حاکیمیتلرینه سون قویموش. گئنه ده اوخویوروق:

"..هخامنشیان هشت هزار پانصد سال پیش در ایران حکومت داشتند. هشت هزاروپانصد سال کجا و دوهزاروپانصد سال کجا. شما این را مقایسه بکنید و به آثاری هم مادر تخت جمشید و جاهای دیگر که از هخامنشیان بدست آمده این را ثابت میکند که آنان هشت هزار و پانصد سال در ایران حکومت داشتند"[6].

اوسته ایشاره ائتدیگیمیز کیمی ایران ممالیکی محروسه سینده یئنی آرخولوژی تاپینتیلاری نین اورتایا چیخماسی فارس شوونیستلرینی اؤز اوستونلوکلرینی قوروماق اوچون بو یول معده گوجونه فیکیر یئریتمه گه زورلامیشدیر. بونلارا باخمایاراق یوخاریدا فارسلارا یازیلان تاریخلره اساساً ماد، پارت و پارس قوملاری نین ایران ممالیکی محروسه سینده نه زاماندان آدلاری نین چکیلدیگینی اورتایا قویدوق. دئمک، مدنیت و تاریخی آبیده لری کیمسه بوش سؤز ایله اؤزونه چیخا بیلمز. بو آبیده لر بوگون فارس حاکیمیتی الینده اولماسینا باخمایاراق اونلارین واریثلری یاشادیقلاری حالدا، اونلار گئج یا تئز بیرلشمیش میللتلرین قانونلارینا اساساً اؤز تاریخ آبیده لرینه ال تاپاجاقلار. آنجاق فارس شووونیستلری و پان ایرانیستلر نه اوچون بو مدنیتلری اؤزلرینه چیخماغا چالیشاراق مدنیت جانی سی اولماغا چالیشیرلار، اونون جاوابی داها ایران ممالیکی محروسه سینده اؤزلرینی فارس اولمایان دیل و مدنیت صاحیبلری نین گؤزلرینه فارس شوونیستلری نین تورپاق سپمه عمللرینده آختاریلمالیدیر. گئنه ده اوخویوروق:

"..پارسی و پارسی کنونی هم اگر قدمت آن را هشت هزاروپانصد سال پیش بدانیم یک گویش از زبان مادی است"[7]

دئمک، هانکی اساس ایله غزنه لی سولطان محمود و سلجوقلو تورکلرین وسیله سی ایله 1000 ایل بوندان اؤنجه افغانیستاندان ایران ممالیکی محروسه سینه گتیریلن بیر دیلین قدیملیگینی بوگون ایران ممالیکی محروسه سینده 8500 ایل حدس وورماق ایسته ییرلر؟ بو دا اؤزلویونده سورقو و سوآل آلتینا آلینمالیدیر؟  بیلیندیگی کیمی فارس دیلی نین کئچمیشی هندوستانداکی سانسکریت دیلینه دایالیدیر. بو دیله تاریخی سابیقه یونتاماق ایسته گنلر او سابیقه نی ایران ممالیکی محروسه سینده دئییل،  هیندوستاندا آختارمالیدیرلار. هانکی اساسدا فارس دیلی اوچون 8500  ایل ماد دیلی دئیه فارس دیلینی او دیلین قالیغی اولدوغو کیمی گؤسترمه گه چالیشیرلار (؟) دئیه دوشوندوکده بو دا اولدوقجا گولمه لیدیر!!!.بو مسئله یه داها آرتیق جاواب تاپماق اوچون اویستا کیتابی دیل و مدنیت باخیمیندان هانکی دیل و مدنیته آخیملی (مئییللی) دیر دئیه بیلیم قایناقلاریندان یولا چیخاراق فیکیر یئریتمه گه چالیشاجاییق.

 

2- زردوشت و اویستا

زردوشت موضوعسوندا فاروق صفی زاده آدلی معلوم الحال شخص ایمضاسی ایله »ایران مهر« ژورنالیندا یازیلمیش یازیدان  اوخویوروق:

"...زردشت یک لقب است. مثل آیت الله العظمی، حجة اسلام، ثقةاسلام. زرتشت هم یک لقب است که در آیین مهر به آخرین مرحله لقب مهری می گفتند.... زردشت مادی لقب داشته است و در تاریخ بنام زردشت مادی آمده است. که این زردشت دقیقاً بر اساس متن گاتاها برمیگردد به 14 هزار سال پیش که در آذربایجان به دنیا آمده است برمیگردد. و در شهر شید باستان در کناره آتشکده آذرگسب امروزی که به نام تخت سلیمان معروف است"[8].

بیلیندیگی کیمی بیر کلمه نین آد یا لقب اولماسی معده گوجو اساسیندا فیکیر یئریتمک ایله دئییل، تاریخی فاکتلارا اساسلانمالیدیر. یئری گلمیشکن آلمان موألیفی Wolfdietrich von Kloeden بیر چوخ قدیمی کیتابلاردان فایدالاناراق[9] زردوشتون دوغولموش یئری، یاشادیغی عصری و هانکی اساسدا ایکیلیک «دوآلیسم» فلسفه سی نی زردوشت منیمسه دیگی نین قناعتینه گلدیگینی اورتایا قویماغا چالیشاجاییق. بئله لیک ایله پان ایرانیستلر زردوشتو آذربایجاندا دئییل، قوزئی تورکمنیستانین باختر و بعضی گؤروشلره اساساً افغانیستانین بلخ شهرلری اطرافیندا آختارماغا چالیشسینلار و بو یانلیش ایفاده لری معلومات دئیه آذربایجان اینسانی نین باشینا "زردوشت آذربایجانلی ایمیش دئیه  بیر داها یاغ سورمه گه چالیشماسینلار.

 

زردوشت (قبیله سی نین آدی سپیتاما) یونانجا زوروآستئر تخمیناً 1000 ایل میلاددان اؤنجه آرال دنیزی نین گونئیینده، ائحتیمالاً تورکمنیستانین باختر بؤلگه سینده، کئچمیشده کی آنتیک دؤنمینه عایید تحقیقاتچیلارین هئرودوت، خئنوپون، پلینیوس و پلوتارش ذات عالیلرین فیکرینه اساساً 630 ایل میلاددان اؤنجه بلخ بؤلگه سینده و بعضی فیکیرلره اساساً 553 ایل میلاددان اؤنجه باختر بؤلگه سینده مزدا دینی نی تازالایان بیر پیغمبر و پریستئر کیمی اورتایا چیخمیش[10]. زردوشتون یاشاییشی اوزره چوخلو افسانه لر وار. بونون دلیلی کئچمیش پارس، اؤزلیکله ساسانیلر (224-661) تاریخینده اونو اولدوغو کیمی دئییل، آباردیلمیش (شیشیردیلمیش) و  اونا دوگم مذهبی دون گئیدیرمه چابالاریندا آختاریلمالیدیر. ساسانیلر زامانینداکی اویستا گلنه یینه (ترادیسیون و سنتینه) اویقون اولاراق زردشتون دوغولوشو و جذابیتی افسانه کیمی اورتایا قویولموش. بونلارا باخمایاراق اونلار اویستانین ایچریگینی (اصل محتواسی نی) گیزله ده بیلمه میشلر. زردشت اینانجی نین ایرانین شمال شرقینده  مالدارچیلار آراسیندا بؤیوک تأثیری وار ایمیش. زردشتون آناسی دوغمادان اؤنجه گؤردوگو یوخویا اساساً: »زردوشت دوغولارکن گولورموش«. بو دئییش و حئکایه نی (آغلاییب گولمه نی) یاخشی نین پیسه قارشین باشاریسی (ظفری) کیمی یوروملاماغا چالیشمیشلار. بو یوروملامالار (تعبیر و تفسیرلر) ایله زردوشت مزدا مذهبی نی یئنیله دیگی سورجده (زامان ایچریسینده) ایکیلیک (دوآلیسم) تعلیمینی زرتشت مذهبینه آرتیرمیش.  زرتشت جاوانلیقدا گاوماتا بودا کیمی دونیادان منزوی ائتمیش. 30 یاشیندا ایکن بیر باشی آشاغی یئرلشمیش داغدا اهورا مزدا، بؤیوک بیلیجی آلله ، طرفیندن پیغمبرلیگه سئچیلمیش. کئچمیش تاریخ حئسابلامالارینا اساساً زردشت تخمیناً 600 ایل میلاددان اؤنجه آمودریا چایی نین قیراغیندا بو مقاما یوکسلمیش. ف آلتهایم (F. Altheim) آدلی موألیفین فیکیرینجه پورپوریوس (234-313 میلاددان سونرا) وئردیگی بیلیگی یه ا اساساً  زردوشتون پیغمبرلیگی 569 ایل مسیحیتدن سونرا اورتایا چیخمیش.

بوگونکو حئسابلامالارا اساساً زردشتون پیغمبر اولماسی ایکینجی کوروش زامانینا عایید اولماسینا باخمایاراق بیرینجی داریوش طرفیندن اهورا مزدا دئیه اونا خیطاب اولموش. ایلاهی دئییم کیمی تانینان »اهورامزدا ویا اورمزد« بیستونون (500 میلاددان اؤنجه) گؤن یازیتلاریندا 9 دفعه تیکرار اولموش. زردشتون گاتالاریندا[11]  وئد[12] دوشونجه لری اؤزونو عکس ائتدیرمکده دیر. بو گاتالار 1000 ایل مسیحیتدن اؤنجه یارانمیشلار. آرال دنیزی نین گونئینده کی قبیر قازینتیلاریندان اله گلن بیلگیلره اساساً او زامان اینسانلار یئر و تورپاغی کثیف دوشوندوکلری (حئساب ائتدیکلری) اوچون اؤلولری یئره قویلامیرمیشلار. ها بئله زردوشت اون ایکی ایل اؤز آیینی نی تعلیم وئره رک  میترا[13] آدلی الله ها عبادت ائتمه نین علیهینه چیخیش ائتمیش. زردوشتون میترا ایله موخالیفت موضوعسو قوربانلیق وئرمه ایمیش. زردوشت قوربانلیغین محدودلاشماسینی اینسانلارا تعلیم وئرمه گه چالیشمیش.آرال دنیزی نین گونئییینده کی آمودریا و سیردریا آراسیندا یئرله شن بؤلگه لرده مالدارلیق ائدنلر کؤچری دئییل، یئرلشمیش ایمیشلر. مالدارلارین مدافعه چیسی و باشچیلاری ساییلان بگ او بؤلگه نی ایداره ائدیرمیش و کناردان اورا اولان هوجوملارا مانعچیلیک تؤره دیرمیش. زرتشت یولو دوشدویو آرال دنیزی نین آلت یانی، خارزم و کالاقیر بؤلگه لری نین یان یؤوره سی و باختر بؤلگه سی دوغرولتوسونداکی یئرلرده او زامان اکینچیلیک و مالدارلیق ایله مشغول اولانلارین یاشادیقلارینی تانیقلیق ائتمیش (مشاهیده ائتمیش). او زامان قونشو یئرلردن (محل و کندلردن) هوجوم ائدن اینسانلار دئولرین موریدی کیمی قلمه آلینیرمیشلار. دئولر هیند مذهبلرینده کی وئد[14]  لرده کی ماهیتی داشی ییرمیشلار.  آنجاق وئدلرده کی بئلنچی آلله لار یا دئولر پیس مووجودلاری اونلاردان اوزاقلادیرمیشلار. اونلارین قارشیسینی آلماق و اخلاق و مذهب سنگری یاراتماق اوچون زرتشت ویشتاسب[15]  آدلی اؤز زامانی نین شاهی ایله بیرلشمیش. »زرتشت«: قیزیللی دوه صاحیبی یا دوه چی آنلامینا (معنی سینه) گلیرمیش. زردوشتون پیغمبرلیک آدیندا (زرتشت کلمه سینده) کئچمیشده کی حیوانچیلیق ائدنلرین و چوبانلارین (حیوان اوتارانلارین) مسلکی ترسیم اولموش. اهورا مزدا اوچون پاداش اولاراق  اون مادیان آت و بیر سایدا آیقیر اؤرنک اولاراق ائرکک آت و دوه وعده ائدیلیرمیش. کئچمیش موناسیبتلری نظره آلاراق بو پاداشلاردان بؤیوک ثروت بیریکیرمیش (توپلانیرمیش). بلخ شهری نین قدیم عیبادت مرکزی دوه ساخلاماق، دوه پروریش وئرمک ایله تانینمیش ایمیش. زردوشت یئنی آیاق باسدیقی (تازا گئتدیگی) بعضی توپلوم ائل و قبیله دینلرینه ایطاعت ائتدیکلری اوچون اورادا آتچیلیق و مال قاراچیلیق (اینک و اؤکوز ساخلاماق ایله مشغول اولماق) مسلکی  یایقین ایمیش. زردوشت اؤز آیین نی بو یئرلرده یایماق اوچون آیری بیر یول (روش) ایله آیینی نی اورالادا یایماغا چالیشیرمیش. او اؤکوزو بیر تمل و اساس موضوع کیمی نظره آلاراق اؤز تعلیماتینی اینسانلارا آنلاتماغا چالیشیرمیش. زردوشت اؤکوز قوربانلیق ائتمه گه موخالیفت ائده رک حاکیم شاه دئییلن ویشتاسب[16] و اونون خانواده سی ایله بیرلیکده  اؤزلرینی ایجتماعیته یاخشی گؤسترمک اوچون اؤکوزو قوربان کسمه گه قارشی چیخیرمیشلار (باخ بئشینجی گاتها!).

قایناقلاردان آلینان بیلگیلره اساساً زرتشت دوستلوق ائدن خانواده لرین بیری نین قیزی ایله ائولنمیش، او خانواده نین باشچیسی »فراشا اوشترا« آدلانیرمیش. زرتشتون قیزی »پوروورو اوییشتا« »یاماسپا« آدلی بیر وارلی و بگ خانواده سی ایله ائولنمیش ایمیش. »یاماسپا« »فراشا اوشترا« نین خانواده سی ایله ده قوهوملوغو وار ایمیش. زرتشتون اوغلو  »ایشاتواشتئرا« آدلانیرمیش. دئییلن افسانه و ناغیللارا گؤره بیر موخالیف بگ زردوشته هوجوم ائده رک اونو اؤلدورموش.

 گاتها و اویستا یازیتی (بنشته لری) اوزره آشاغیداکیلاری دئمک اولار:

  گاتهالار 17 بؤلومدن عیبارتدیرلر. اونلار زرتشتون اؤنملی تعلیمات و آیینلرینی و اونون یاشاییشینی ایچرمکده دیرلر. اونلار مذهب تاریخ بیلیمی اوچون چوخ اهمیتلیدیرلر.

گاتها یاسنا: گاتها ادبی بیر بؤلوم (قیسمت) اولاراق یاسنانین اساسینی تشکیل و اویستانین مراسیملرینی ایفاده ائدر. اورادا موضوع قانسیز ایثار ائتمکدن عیبارتدیر. بؤلوملر بیت اولاراق بئش گاتها ویا سرود بؤلومونه  آیریلمیشلار.

  1- گاتها آهوناوایتی(Yasna-Kapitel 28-34): بو بؤلوم واجیب عیبادتلری ایچرمکده دیر (شامیل اولماقدادیر).

2- آهونا وایریا ((Yasna-Kapitel 43-46: بو بؤلوم گاتها هاپتانهایتی ایله بیرلیکده دیر، و سونراکی زامانلارا عاییددیرلر.

3- گاتها سپئنتا ماینیو (Yasna-Kapitel 47-50):

4- گاتها ووهو خشاتهرا (52 +Yana-Kapitel 51 ): دعا متین اولاراق یازیلمیش.

5- گاتها واهیشتویتی (Yasna-Kapitel 53):+ دعا آیریمان ایشیا (Yasna-Kapitel 54).

اوسته کیلره Yasna-Kapitel 14 +Yasna-Kapitel 15  کؤمک اوچون یالماروا دعا دئیه آرتیریلمیش.

Yasna-Kapitel 56, Yasna-Kapitel 58, 1-3 دوعانین تأثیرینه داییر بیر آچیقلاما وئریلمیش. بونلارین هامیسی بیرلیکده ییرمی بیرینجی "نسکس" دن بیرینجی "نسکس" دئییلن بندین اساس ایچریگینی (محتواسینی) اولوشدورورلار.  

1-2 اویستانین یازیلیشی

گاتهالار ایلک اولاراق آغیز یولو (شفاهی) واسیطه سی ایله قورونموشلار. بونلاری یازی بیچیمینده تثبیت ائتمک میلادین 13 اونجو یوز ایلیندن باشلامیشدیر. گاتهالارین یاشلارینی بلیرله مک اولدوقچا چتین ایشدیر. ریگ وئدا[17] متینلری ایله اویستا متینلری نین قوهوملوغونو (دینی مفکوره آچیسیندان) نظره آلارساق 1000 مسیحیتدن اؤنجه و یا سونرالار اویستانین اورتایا چیخماسینا داییر فیکیر یئریتمک مومکوندور. بو مسئله زردوشتون نه زامان یاشاماسینا داییر ده فیکیر یارادا بیلر دئیه دوشونمه لی ییک. بو دوغرولتودا بوگون آراشدیرماجیلارین بیر چوخو بو قناعته گلمیشلر  (bax. Josef Wiesenhöfer, a.a.O., S. 142). دئییلنلره گؤره زردوشتون مقدس کیتابی شاه ویشتاسپ ذات عالیه تسلیم ائدیلمیشدیر. اهورا مزدا 21 نسکس (قعطه کیتاب) تألیف ائتمیشدیر. عربلرین گله نکلرینه اساساً الیازیلارینین دؤرتدن اوچونون (سه چهارم) ایتمه سی و یوخ اولماسینا باخمایاراق 12000 اؤکوز دریسی اونلاری یازماق اوچون ایسیفاده اولونموشدور. فرانسه عالیمی، آنکتیل دوپرون (A.H. Anquetil-Dupperon) (1731 – 1805) اوستا کتابینی هندوستاندان آوروپایا آپارمیش. آنکتیل دوپرون ایلک اولاراق اویستادان بیر چئویرمه (ترجومه) یایینلامیش.  بو چئویرمه اویستا تانیماقدا باشلانقیج ساییلار. اویستادا ایشلنمیش بعضی سؤزجوکلرین آنلامینی باشا دوشمک اولدوقجا چتین. اویستا تانییانلار بیله بو سؤزجوکلری باشا دوشوب دوشمدیکلری اوزره دوشونجه بیرلیگینه وارمیش دئییللر. 1968- اینجی ایل گرشویچ یئریتدیگی ایفاده لره اساساً اویستادا آنلاشیلماز مقاملارین چوخ اولدوغونا باخمایاراق زرتشتین دوشونجه و فیکیرلری اونون شعرلری و ایفاده لریندن آنلاشیلار.  پور داوود 1937- اینجی ایل کیریستین بارتولومه نین  چئویرمه و تفسیر ائتدیگی اثریندن فایدالاناراق اویستانی فارسچایا چئویره رک اونو چاپ ائتمیش. بارتولومه ایستر سانسکریت و ایسترسه ده اویستا دیلینی بیلن بیریسی اولموش. دئییشلره گؤره مؤبدلر (زرتشت روحانیلری)  اویستانی نسیلدن نسیله ازبر ائتمیش و سونرا اونو یازییا کؤچورموشلر.

3- پیغمبر ایسلامین ایرانی (فارس) اولماسی!!

 ایسلام پیغمبری نین ایرانی گؤسترمه لرینه داییر فاروق صفی زاده آدلی معلوم الحال شخص ایمضاسی ایله »ایران مهر« ژورنالیندا اوخویوروق:

"پیامبر اسلام، پیامبر ایرانی... ابراهیم زردوشت، نامی بوده یعنی از قرن دوازدهم به بعد هر کجا اسمی از ابراهیم آمده است یا ابراهیم زردشت و یا زردشت ابراهیم آمده است. که این نشان می دهد، وی کاملاً ایرانی و آریایی و همه پیامبران اسرائیل از جمله اسماعیل و اسحاق از نسل او هستند.... خود پیامبر اسلام هم ایرانی بوده است. همانطور که ما از پیامبر اسلام حدیث داریم، می گوید: عرب از من است و من از عرب نیستم. در خود قرآن هم یک آیه داریم می گوید: الاعراب اشد نفاق والکبر.عرب از کفر و نفاق بدتر است. این آیه ثابت میکند که خود پیامبر نم تواند از عرب باشد... این آیه ثابت می کند که  خود پیامبر ایرانی است و خیلی ها عقیده دارند که قبیله کوروش همان قبیله قریش است، که از کورش گرفته شده که در عربی شده است قریش و این همان قوم کورش بوده است، که از ایران رفته اند به عربستان و می دانیم که عربستان جزء خاک ایران بود. اگر کسی می خواستند تبعید کنند، می فرستادند عربسان. همانطور که مزدکیان را به عربستان تبعید کردند"[18].

اوسته ایشاره ائتدیگیمیز کیمی زرتشتون دقیقاً نه زامان یاشادیغی بللی دئییل، و اویستا موألیفی  اولان زردوشتدن باشقا هئچ بیر کس ده تاریخی قایناقلاردا زردوشت دئیه ذیکر اولونمامیشدیر.  یالنیز زرتشت یانچیلاری و مؤبدلری میلادین 13 اونجو یوز ایللرینده سینه لر ازبری اولان ناغیل و تعالیملری توپلاییب کیتاب ائتدیکلریندن سونرا   بو کیتابداکی زرتشتون هندی مفکوره لری هیند دینلرینده اولان ریگ وئدا قوشمالارینا و اوراداکی فیکیر بنزرلیکلری ایله قارشیلاشدیریلدیقدا میلاددان 1000 اؤنجه، حتی سونرالار بو فیکیرلرین اورتایا آتیلدیقلاری و بئله لیکله زرتشتون سونراکی ایللر یاشادیغی تخمین ائدیلیر. یونانین آنتیک دؤورونه عایید آراشدیرماجیلاری هئرودوت، خئنوپون، پلینیوس و پلوتارش ذات عالیلرین فیکرینه اساساً زردوشت 630 ایل میلاددان اؤنجه بلخ بؤلگه سینده باشقا فیکیره اساساً 553 ایل میلاددان اؤنجه باختر بؤلگه سینده مزدا دینی نی تازالایان بیر کشیش و روحانی شخصیت اولموشدور[19]. زردوشتون 13 یوز ایل میلاددان سونرا اویستا کیتابی ناغیللاریندا آدی نین تیکرار اولماسی یونان آنتیک دؤنمینه عایید فیکیر صاحابلاری نین دئدیکلرینی زرتشتون آدی باخیمیندان دوغرولامیش اولورلار. دئمک، زرتوشتون آنادان دوغولدوقدا آدی نین نه اولدوغونو بیلمه سک ده، او زامان اهورا مزدا ذات عالیلرینه پاداش اولاراق موریدلری طرفیندن اون مادیان آت و بیر سایدا آیغیر دوه و آت وئردیکلرینی اؤیرنمیش اولوروق. بیلیندیگی کیمی قدیم بعضی کولتورلرده (او جمله دن عرب کولتورونده) دوه نفر ساییلدیغی اوچون بلکه ده اهورا مزدا اوچون وئریلن پاداش "زرتوشت" (قیزیللی دوه) زامان گئدیشی ایله قیزیل دوه صاحابی و دوه چی حالینا گله رک اونا (زرتوشت حضرتلرینه) بیر آد کیمی خیطاب اولموشدور.دئمک، پان ایرانیست و باستانگرایلارین آدسیز پیامبرلری زامان کئچیدی ایله زرتوشت (قیزیللی دوه و دوه چی) آدینی قازانمیشدیر دئیه فیکیر یئریتمک اولار.

ابراهیم خلیل الله آدی ایله ایسلام دینینده تانینان حضرت ابراهیمی پان ایرانیستلر بیر زرتوشت (ایسلام اینانجینا گؤره کافر!) کیمی معرفی ائتمه لرینه گلدیکده تهرانداکی ایسلام بایراقدارلاری نین عباسی آلتینا سوخولموش پان ایرانیست فیکیر صاحیبلریندن بوندان آرتیق گؤزلمک اولماز. دئمک، اونلار حضرت ابراهیمین نمرود احوالاتیندا اؤزونو اودا آتما حئکایه سیندن یانلیش فایدالاناراق تهراندا ایسلام حاکیمیتینی فارس شوونیسمی نین خیدمتینه چکسینلر دئیه اوسته گؤروندوگو کیمی سام دیل و مدنیتلرینه عایید اولان پیامبرلرین اصلیتلرینی آریالی قلمه آلماغا چالیشیرلار. بو عوامفریبلیکلره باخمایاراق سام دیل و مدنیتلرینده کیملیک آغاچی "شجرة النّسب (شجره نامه)دئدیکلری اوزون کئچمیشدن بوگونه گلن بیر گؤره نک (عادت) و گله نک (عنعنه) حالیندا یاشاماقدادیر. او گله نک و گؤره نگه اساساً حضرت محمددن 12 آرخا گئری یه دوغرو قورئیش طایفاسی نین بیرینجی شخصی نین کیم اولدوغو دا دونیا ایجتماعیتی اوچون بللیدیر. آنجاق فارس شوونیستلری نین یالانلاری عوام اینسانلار اوچون ده گؤرونسون دئیه قورئیشین کیم اولدوغو شاه حسین اوردونلونون شجره النّسبیندن اوخوماق اولار[20]

آرتیق یئر توتماسین دئیه اوسته یالنیز حضرت محمددن اؤنجه کی شخصلرین کیم اولدوقلارینی اوخوجولارین دیققتینه یئتیرمک ایستردیک. اوسته گؤروندوگو کیمی قورئشین فامیلی کمبوجیه یا ماندانا حتی خیالی کورش کورش دئییل،  قورئیش فیهر دیر و آدلارین هامیسی آرخا آرخا عربجه دیرلر و او زامان پارس ویلایتینده رایج اولان آدلارا بنزر هئچ بیر آد گؤرونمور..

 

 

 

 

 

 

قایناقلار

 

 



[1]  ماهنامه ایران مهر، تهران، 1384،  شماره تیر و مرداد.

[2]  ماهنامه ایران مهر، تهران، 1384،  شماره تیر و مرداد. صحیفه 77، 78 و 79.

[3]  آرش مقدم الوندی: http://www.arash.de/gesch/text/Irangeschi2.htm#Die%20Aschkaniden

[4]  Deutsche Bundesbank Museum, Goldmünzen der Sasaniden:   

   http://www.geldmuseum.de/download/sonder_goldmuenzen_der_sasaniden.pdf

[5]  باخ ماهنامه ایران مهر، تهران، 1384،  شماره تیر و مرداد. صحیفه 77، 78 و 79.

[6]  باخ اورادا.

[7]  باخ اورادا.

[8]  باخ اورادا.

[9] Biographisch-Biographisches Kirchenlexikon, Band XIV, 1998;Verlag Traugott Bautz Spalten 344-355

[10]  گؤروندوگو کیمی مزدا آیینی زردوشتدن اؤنجه ده بیر اینانج اولاراق وار ایمیش. زردوشت یالنیز بو آیینی یئنیله مه گه چالیشمیشدیر. بو مسئله انجیل کتابیندا مسیح دینی اوزره صیدق ائدیر. بیلیندیگی کیمی اینجیل کیتابی نین دا عهد عتیق و عهد قدیم دئیه ایکی واریانتی واردیر.

[11]  گاتا: شعر و سرود وزنینده یازیلان زردشتین کلاملاری.

[12]  وئدا: اسکی هند دینی متین لری نین دؤردوندن هر بیری (ریگ، ساما، یاچور و آتهاروا).

[13]  میترا 1400 ایل میلاددان اؤنجه زردوشت عایید اولان دیل و مدنیتده بیر الله کیمی قبول ائدیلیرمیش. بو دئییم »میترا« اسکی هیند مدنیتیندن آلینمیش بیر دئییمدیر، »دسته« و »دوست« آنلامی داشیماقدادیر.

[14]  باخ 12.

[15]  ویشتاسب بورادا پارسلارین شاهی کیمی تانینان داریوشون آتاسی نظرده توتولمور.

[16]  باخ 15.

[17]  ریگ وئدا:وئدا- مدداحلیق قوشماسی و سرودلاری (هیند مذهبلرینده).

[18]  ماهنامه ایران مهر، تهران، 1384،  شماره تیر و مرداد. صحیفه 77، 78 و 79

[19]  باخ 9.

[20] The Familz Tree of His Majestz: King Hussein of Jordan:  http://www.kinghussein.gov.jo/tree_english.html

 

 

ایشیق سؤنمز 15.09.2005