اورمو گؤلونون قورودولماسی فارس ایستعمارچیلیق تئوریسی نین آیریلماز ترکیب حیصصه سی ساییلمالیدیر

اورمو گؤلونون قونشولوغوندا اولان گؤللرین سو دورومونا نظر سالاراق اورمو گؤلونون قوروماسی نین هانکی آشامادا آخین ائتدیگینی اؤیرنمک داها راحات بیر مسئله ساییلار. فارس حاکیمیتی و اونون گونئی آذربایجانداکی ایستعمارچیلیق نماینده لیکلری طرفیندن اورمو گؤلونه آخان چایلار اوزره قورولموش سایسیز سوبوغوملاری و  سدلری نظره آلیندیقدا بیلیم دونیاسینا غریب و اؤگئی بیر گؤرونتو ایله اوزله شه ریک. بو مسئله ظاهیرده یانلیش بیر داورانیش کیمی گؤرونسه ده، فارس ایستعمارچیلیغی نین ماهیتی ایله تانیش اولموشلار طرفیندن بو یاناشما هئچ ده غریبه نظره آلینماز.  بو مسئله نین دوغرو و دوزگون اولدوغونو اؤیرنمک اوچون فارس ایستعمارچیلیق حاکیمیتی نین تملینی قویموش محمود افشار یزدی نین گؤروشلری ایله تانیش اولماق لازیم. محمود افشار یزدی ایران ممالیکی محروسه سینده میللیتلر مسئله سینی حل ائتمک اوچون فارس حاکیمیتچیلیگینه اؤنرمیش تکلیفینده یازیر:

"تورک دیلی نین  بو بؤلگه لره (گونئی آذربایجانا) تحمیل اولماسی، اؤزگه و غیر طبیعی گؤرونمه سی هئچ کیمسه یه گیزلین دئییل. بو دیل مملکت آلماق اوچون تورک دیل و مدنیتی یانچیلاری الینه بؤیوک باهانا وئرمیش. اونلار دئییر: قان ایچن اتا بابالاریمیز چنگیز، تیمور و سلجوقلار نئچه یوز ایل اؤنجه بو مملکته هوجوم ائتدیکلری، چاپیپ تالادیقلاری، دیللرینی بو مملکته تحمیل ائتدیکلری و بیز اونلارین دیللرینی باشا دوشدوگوموز اوچون سیزلر  (فارسلار) میللی، وطنی، دینی و تاریخی قارداشلارینیزدان ال چکمه لی و اونلارین بیزه قاویشمالارینا ایمکان وئرمه لی سی نیز"[i].

اوسته گؤروندوگو کیمی فارس ایستعمارچیلیغی نین قوروجوسو بیر یاندان گونئی آذربایجانداکی تورک توپلومونو تاریخ آچیسیندان میللی تئرور ایله اوز اوزه قویار، باشقا یاندان اونلارین میللی، مدنی و سیاسی تشکیلاتلاری نین یاراناجاغینی قونشو و خاریجی عامیللره نیسبت وئرمکله هر هانکی بیر میللی، سیاسی و مدنی آچیلیما گونئی آذربایجان تورکلرینی محروم ائتمگه چالیشار. سلجوق تورکلری تاریخ آچیسیندان آذربایجانلیلارین تاریخی آتابابالاری اولدوقلارینا باخمایاراق اونلار فارسچانی افغانستاندان ایران ممالیکی محروسه سی و آنادولویا دیوان دیلی دئیه گتیرمکله بؤیوک خیدمتی فارس دیل و ادبیاتینا ائتدیکلرینه باخمایاراق دوز چؤرک بیلمز فارس ایستعمارچیلاری عوامفریبلیک ائتمک اوچون دوزو یئییب، دوز قابینا اوتورماق ایسترلر. فارس ایستعمارچیلیغی گونئی آذربایجاندا باشاریلی اولماسی اوچون محمود افشار یزدی یازیر:

"دؤلت داخیلی و خاریجی خطرلردن قورونماسی، اوزون عؤمورلو و  باشاریلی اولماسی اوچون  گرک زامان ایچریسینده دیل باخیمیندان ایرانلیلارین دیل بیرلیگینی (اوخو فارس اولمالارینی) حیاتا کئچیرمه لیدیر"[ii].

محمود افشار یزدی ایچ خطرلر دئیه فارس ایستعمارچیلیغی علیهینه "یاشیل (ایسلامیت، عرب)"، "ساری (تورک دیل و مدنیت صاحابلاری) دئیه "قرمز (کمونیسم، روسیه کمونیستلیک مفکوره سی نین) بویاقلاری فارس حاکیمیتی، سیاستچیلری و عوام خالق ذهنیتینده جانلاندیرماغا چالیشارمیش[iii]. محمود افشار یزدی فارس ایستعمارچیلیغینی ایران ممالیکی محروسه سینده تثبیت ائتمک و فارس اولمایان ائتنوسلارین جغرافی تورپاقلارینی فارسلیق و فارس ایستعمارچیلیغینا تابع توتماق اوچون وحدت میللی آدینا غصب ائتمک نیتی ایله یازیر:

" ماده 3: آذربایجان و عربستان طایفالارینی ایران ممالیکی محروسه سی نین مرکزینه کؤچورمک و اونلاری شهرلرده یئرلشدیرمک و فارس دیللیلردن بو  ایالتلره یئرلشدیرمک و قاریشیق بیر توپلوم یاراداق فارس دیلینده مدرسه لر آچماق بیرینجی آددیم ساییلار. حاکیمیته اقتصادی قوشول و شراییط ایجازه وئررسه،آذربایجان و عرب طایفالارینی باشقا ویلایتلره کؤچوروپ اونلاری شهرلی ائده رک فارسلاشدیرماق گرکلی ساییلار.باشقا اشکاللار (اوخو بو خالقلارین دیل و مدنیتلری نین یوخ اولمالاری، اونلار اؤز ائل اوبالاریندان دیدرگین دوشمه لری) اؤنملی و مهم دئییل. نتیجه اعتیباری ایله هر یئرده اونلارا یئر وئریلرسه، اورا اونلارین وطنی اولار"[iv].

اوسته کی محمود افشاری یزدی نین ایستعمار دوشونجه و فیکیرلری آشاما آشاما فارس حاکیمیتچیلری طرفیندن حیاتا کئچمیش ساییلار (یالنیز فارس توپلوموندان آذربایجانا کؤچورمه ده باشاریلی اولمامیشلار. بو دا فارسلارین او زامانلار آذربایجاندا تحلیله گئتمه سیندن ایرلی گلن بیر گؤلوش کیمی قلمه آلینابیلر. او زامانلار فارس ائتنیکینه منسوب اولانلارین بیر چوخو دا فارسچانی دوغرو و دوزگون اوخویوب یازمانی بیلمیرمیشلر). بونلارا باخمایاراق فارس ایداره لری نین آذربایجاندا ایشه باشلاماسی و یئنی تحصیل سیستیمی نین اورتایا چیخماسی ایله آذربایجان تورکلرینی اراک، تهران و همداندان شهرلریندن باشلاراق آذربایبجانین قلبینه دوغرو فارسلاتماغا باشلاماق ایله حیاتا کئچمگه باشلامیش بیر حل چاره یولو دئیه قلمه آلینمیش. بوگونکو اورمیه  گؤلونو قوروتماق ایله گونئی آذربایجانلیلاری کویر لوت و کویر نمک چؤللرینه کؤچورمک پلانی دا محمود افشار یزدی نین وئردیگی تئوریلر اوزرینده فارس ایستعمارچیلاری نین ایشله دیکلری چابالارین نتیجه  سی ساییلمالیدیر. اورمو گؤلو مسئله سی حیددت و شیددت تاپمادان خوزیستانین کارون چایی نین آخارینی فارس چؤللوکلرینه چئویرمک چابالاری دا آذربایجان خالقینا فارسیستاندا سراب گؤسترمک و آذربایجان تورکلرینی فارسلیق باتلاغیندا یوخ ائتمک اوچون دوشونولموش پلانین ترکیب حیصصه سی ساییلمالیدیر.  دئمک، بیر یاندان آذربایجان خالقی نی مجبوریت قارشسیندا کؤچمگه زورلاماق باشقا بیر یاندان فارسیستان کویرلیکلرینده یئرلشمک ایمکانی وار دئیه آذربایجان تورکلرینی فارسلیق باتلاغینا سوروکلمک دوشونولموش بیر تئوری نین عمله کئچه جک ترکیب حیصصه سی کیمی قلمه آلینمالیدیر. باشقا بیر آدیم آذربایجان شهر، کند و داغ داشلاری و دنیز آدالاری نین دگیشیلمه سینی و اونلارین فارسلاشدیرماسینی نظرده توتار، محمود افشار یزدیدن بو دوغرولتودا اوخویوروق:

"ماده 4: ایالت و ولایتلری بیر داها بؤلمک، آذربایجان و عربستان آدلارینی آرادان آپارماق منظور اولمالیدیر. اوسته لیک ایالت و ولایتلری بؤلکمکده اقتصادی و سیاسی عامیللر نظره آلینمالیدیر. ... یئنی بؤلگو بیر سیاسی عامیل کیمی میللی بیرلیگین تکمیللشدیرمه لیدیر. یئنی بؤلگوده بؤلمه لر چوخ کیچیک و آدی چکیلن سیاسی مصلحتلر خیدمتینده  اولمالیدیر"[v].

محمود افشار یزدی نین اوسته کی فارس ایستعمارچیلیق تئوریسی ده یوزده یوز و آرتیقلاشا عمله کئچمیش ساییلار. بیلیندیگی کیمی ایران ممالیکی محروسه سی نین تاریخینده کی "آذربایجان ایالتی" ایلک اولاراق شرقی و غربی آذربایجان، گیلان، قزوین، کوردوستان، کیرمانشاهان و تهران ایالت و ولایتلرینه بؤلونموش. بؤلونمه ده ائتنیک آذربایجانین بیر بؤلومو گیلکلر ایله رشت شهرینه باغلانمیش، بیر بؤلومو سونقور تورکلری باشدا اولماقلا سنندج شهرینه، بیر بؤلومو میللی آزلیق اولاراق کیرمانشاهان ولایتینده کیرمانشان شهرینه، بیر بؤلومو اراک شهرینه، بیر بؤلومو تهرانداکی حاکیمیت داییره لرینه، بیر بؤلومو قزوین شهری باشدا اولماقلا آیری آیری فارس ایستعمارچیلیق حاکیمیت داییره لرینه تابع توتولماغا باشلامیش. سونراکی بؤلگوده اردبیل ولایتی دئیه شرقی آذربایجان ایکیه بؤلونموش، تهران ایالتی ده ایکی ولایته، تهران و البرز ولایتلری (کرج شهری) دئیه ایکیه بؤلونموش. بو مسئله لر ظاهیرلر یئرلیلرین راحاتلیغی اوچون ایلری سورولسه ده، محمود افشار یزدی نین تئوریلرینه اساسن اولدوقجا سیاسی و امنیتی بیر مسئله ساییلار. آذربایجانین کئچمیشده تورکچه اولموش یئر آدلاری نین فارسچا عئبجر یازیلماسینی و بیر چوخلاری نین فارسلاشدیریلماسینی گؤز اؤنونه آلدیقدا بو مسئله لر فارس ایستعمارچیلاری نین کؤنلونچه اولموش داورانیشلار  ساییلمالیدیرلار.

بیلیندیگی کیمی فارس ایستعمارچیلیغینی نماینده لیک ائدن موسی الرضا ثروتی، اوزدن ایراق تورک بجنورد میللت  وکیلی اورمو گؤلونون یاشادیلماسی ایله مخالیفت ائده رک دئمیش:

"اکینچیلرین زیان و ظرر لرینه حاکیمیت بودجه آییرماق یئرینه اونلارین اورالاردان کؤچمه سی اوچون پول وئرمه لی. بئله لیکله اونلار اورادان کؤچه رک آیری ایشلر ایله مشغول اولمالیدیرلار.[vi]

گؤروندوگو کیمی موسی الرضا ثروتی نین بو گؤروشو ده محمود افشار یزدی نین گؤروشونون حیاتا کئچمه سینی تماملامیش اولار. آذربایجانلیلار علیهینه تضییقلر حیاتا کئچرکن فارس ولایتلری نین آبادلاشماسی و آذربایجانلیلاری فارسلیق باتلاغینا سورومک چابالاری دورمادان حیاتا کئچمکده دیر. ایرنا خبرچیلیگیندن فارس ولایتلرینه سو چکیلمه سی دوغرولتوسوندا اوخویوروق:

عمليات اجرايي تونل سوم كوهرنگ از سال 74 شروع شده است.
به گزارش ايرنا، 'عليرضا همدانيان' روز پنجشنبه در بازديد از تونل سوم كوهرنگ افزود: حدود 111 متر از حفاري اين تونل باقي مانده است كه ظرف هشت الي 9 ماه آينده به اتمام مي رسد.
وي با بيان اينكه كارفرماي اين پروژه شركت آب منطقه اي اصفهان است، اضافه كرد: در اين پروژه 300 نفر اعم از كارگر و كادر فني در سه شفيت كاري مشغول به فعاليت هستند. همدانيان، نوع ساختار و پيچيدگي كار اين تونل 5/23كيلومتري را ياد اور شد و گفت: علت طولاني شدن حفاري اين تونل برخورد با گسل هاي مختلفي از جمله ماسه و گل و لاي بوده است. وي افزود: اين تونل زمينه انتقال 100 ميليون متر مكعب آب را در سال به استان اصفهان فراهم مي سازد. همدانيان با بيان اينكه 5/99 درصد از كار آزاد سازي و حفاري اين تونل انجام شده است، گفت: رسانه ها به خصوص صدا و سيما بايد اطلاعات كاملي در اين خصوص در اختيار مردم قرار دهند.
مدير عامل شركت آب منطقه اي صفهان نيز گفت: عمليات اجرايي سد كوهرنگ سه شروع شده و تاكنون 15 درصد پيشرفت فيزيكي داشته است.
'محمد علي طرفه' با بيان اينكه اين سد در چهار سال آينده به بهره برداري مي رسد، اضافه كرد: با احداث اين سد ظرفيت انتقال آب از كوهرنگ سالانه به 250 ميليون مترمكعب خواهد رسيد. وي اظهار داشت:
ريزش در تونل سوم كوهرنگ، اتمام عمليات را سخت كرده است اما در آينده نزديك شاهد بهره برداري از آن خواهيم بود.[vii]

اوسته گؤروندوگو کیمی قوزئی آذربایجان جمهوریتی نین مستقیللیگه قاویشماسی ایله دوشونولموش و 16 ایل اؤنجه میلیاردلار  دولار پول ایله ایشه باشلامیش پروژه لر و سونراکی خزر دنیزیندن میلیاردلار دولار سرمایه واسیطه سی ایله سیمنان ولایتینه چکیلجک سولار[viii] آذربایجان تورکلرینه "سراب" گؤسترمکله اونلاری فارسلیغین باتلاغینا سوروکلمک و بئله لیکله ده  آذربایجانلیلاری بیر میللی اولاراق یوخ ائتمک فارس ایستعمارچیلیق مفکوره سی ساییلار. باشقا بیر یازی کارمندنیوز سیته سینده یئر آلمیش، اونو دا ائشیتمک پیس اولماز:

نورالله حیدری نماینده فارسان از مخالفان طرح دو فوریتی آب دریاچه اورمیه بود که گفت: چرا باید کل یک میلیارد تومان بودجه تخصیصی به مشکل غبارها و جریانهای آبی کشور، به دریاچه ارومیه پرداخت شود؟ چرا باید به ازای بهبود وضعیت یک نقطه کشور، دیگر بخشها را دچار مشکل کنیم؟.[ix]

اوسته گؤروندوگو کیمی آذربایجان معدنلری نین فارس ولایتلرینه داشینماسی، آذربایجان یئر آلتی و یئر اوستو قایناقلاری نین فارس ایستعمارچیلاری طرفیندن تالان اولونماسی، آذربایجانین ذهنی و فیکیزی گوجونون فارسلیق اختیارینا قویولماسی گؤز آردی ائدیله رک اولمایاجاق بیر پروژه اوسته فارس ایستعمار یانچیلاری آذربایجانلیلارا آغیز بوزمک ایسترلر. بیلیندیگی کیمی سؤز قونوسو اولموش آراز چایی نین اورمو گؤلونه گتیریلمه سی، ایستر دؤلتلر آراسی حقوق باخیمیندان، ایسترسه ده آراز چایی نین سویونون بوللوغو آچیسیندان اورمو گؤلونه گلجک و بو گؤلو یاشاداجاق مقامدا دئییل. بونلارا باخمایاراق فارس ایستعمارچیلاری و اونون یانچیلاری آذربایجان خالق اجتماعیتینه یالان موضوعلارلا سوسو وئره رک اونلاری آلداتماغا چالیشارلار. بو دا آذربایجان خالقینا حددن آرتیق باغیشلانماز تحقیر ساییلار.

 



[i]  محمود افشار، آینده، جلد دوم، تهران، چاپ دوم 1351، صحیفه 565-566.

[ii]  محمود افشار، آدی کئچن اثر، صحیفه 566.

محمود افشار، آدی کئچن اثر، خطرهای سیاسی، صحیفه 921 929.   [iii]

[iv]  محمود افشار، آدی کئچن اثر، صحیفه 566.

[v]  محمود افشار، آدی کئچن اثر، صحیفه 566.

[vi]  سايت خبر آنلاين: http://iwww.khabaronline.ir/news-168160.aspx

 [vii] معاون استاندار اصفهان: تونل سوم كوهرنگ تا پايان امسال به بهره برداري مي رسد،    تاريخ انتشار : 02/04/1390 : http://irna.ir/NewsShow.aspx?NID=30444878

    http://www.entekhab.ir/fa/news/29961    انتقال آب دریای خزر به استان سمنان تا پنج سال آینده، سایت انتخات تاریخ انتشار: ۰۷ تير ۱۳۹۰: [viii]

[ix] نمایندگان به انتقال آب به دریاچه ارومیه رای ندادند/تا2سال دیگر باران نمکی جایگزین دریاچه نمکی میشود، تاریخ درج 25 مرداد 1390: : http://karmandnews.ir/shownews.aspx?ID_News=20455

 

 

ایشیق سؤنمز، 29.08.2011