میللی حرکتی قورومانین یوللاری

 

 

بیلیندیگی کیمی میللی مسئله دونیا گؤروشو قیسیتلاماسی تانیمادیغی اوچون موختلیف بویاقلی شارلاتانلار آذربایجان میللی حرکتینی 1324-1325 ایللرینده یئنیلگه یه اوغراتدیقلاری کیمی اؤزگه لر خیدمتینده اولدوقلاری اوچون کئچیت شخصی چیخارلارینی نظره آلاراق آذربایجان میللی حرکتینی یئنیلگه یه اوغراتماغا چالیشاجاقلار. بو باخیمدان آذربایجان میللی فعاللاری میللی حرکتیمیزی قوروماق اوچون معلوم الحال شخصلرین گولر اوزلرینه و سؤزلرینه  آلدانمایاراق تمکینلی حرکت ائده رک آذربایجان میللی مفکوره  سینی آذربایجان ایجتماعییتینده یایماغا چالیشمالیدیرلار.

 

آذربایجان میللی حرکتینی فارس ایططیلاعاتچی اورگانلاری و معلوم الحال شخصلردن قوروما یوللاری

 

1                    آذربایجان میللی حرکتینی قوروماق اوچون معلوم الحال شخصلری آذربایجان میللی حرکتیندن اوزاقلاندیرماق هر بیر  آذربایجان میللی فعالینین بیرینجی میللی بورجو ساییلمالیدیر. بو باخیمدان آذربایجان میللی حرکتی داخیلینده بیر شخص معلوم الحال نظره گلدیکده ایلک اولاراق او شخص ایله آذربایجان میللی مسئله لرینی بیر ساده وطنداش ساحه سینه دوشورمه لی و آذربایجان میللی فعاللاری و ایستراتئژیک مسئله لر اوزره او شخصه آرتیق بیلگی و معلومات وئریلمه مه لیدیر.

2                    آذربایجان میللی فعاللاری معلوم الحال شخصلری خوش گؤرو ایله اؤزلریندن اوزاقلاداراق اونلاری باشقا آذربایجان میللی فعاللاری ایله رابیطه قورما و میللی حرکتین گئدیشاتی اوزره بیلگی و معلومات الده ائتمه لرینی صیفیره ائندیرمه لری گونون مسئله سی کیمی اؤن پیلاندا دورمالیدیر (بو شخصلرین باشقا آذربایجان میللی فعاللارینی تانیمالاری و اونلارین باشقالاری ایله رابیطه لرینی اؤیرنمه لری تهران تبریز قارشی دورماسیندا آذربایجان میللی حرکتینی بؤیوک تهلوکه ایله اوز اوزه قویا بیلر دئیه دوشونمه لی ییک).

3                     نوفوذی و معلوم الحال بیر شخص آذرباجان میللی فعاللاری ایله اورگانیک رابیطه یاراتمیشسا، او اورگان و رابیطه عامیللرینی (ییغینجاق، دانیشیق، مشورت، سایت و ساییره) کئچیت اولاراق تعطیل حالینا گتیرمه لی، سونرادان بیر داها یئنیدن آذربایجان میللی مسئله سی اوزره ساغلام شخصلر ایله گؤتوروشمک آذربایجان میللی مسئله سینین گله جه گی اوچون اویغون حئساب ائدیلمه لیدیر.

4                     آذربایجان میللی مسئله سینده اعتیمادسیزلیق، اؤز باشینالیق حاکیم اولماسین دئیه شانتاژ ماهیتلی خبرلرین یاییلماسینا زمینه یاراتمامالی، هر بیر شانتاژ ماهیتلی خبری ائشیتدیکده اونو باشقالارینا یئتیرمک دئییل، اونوتماغا چالیشماق گونون مسئله سی کیمی گؤرونمه لیدیر.

5                     آذربایجان میللی منافعینی نظره آلاراق اوزاق گؤرنلیلیک ایله فارس حاکیمیتینده اولان تورک کؤکنلی مقام و منصب صاحابلارینی آذربایجان میللی مسئله سینی تهراندا طرح ائدر دئیه آذربایجان تشکیلاتلاری ایچینه سوخولماقلاری اوچون شراییط یاراتمانی آذربایجان میللی منافعینه بالتا ووراجاق عامیل کیمی نظره آلماق گونون مسئله سی اولمالیدیر.

 

 

 

 

ایشیق سؤنمز 02.09.2005

میللی مسئله