فئدرال آذربایجان دئموکرات حرکاتی آدلی تشکیلات اوزره تأثیراتلاریمیز!

 

 

 هر میللتده اولدوغو کیمی آذربایجان میللی مسئله سینده  ده موختلیف آخینلارین اولماسی طبیعی قارشیلانمالیدیر. دئمک آذربایجان میللی حرکاتیندا ایستیقلالچی، فئدرال و داها اولوملو بوگونکو ایران ممالیکی محروسه سینده کی فارس اولمایان میللتلری نظره آلاق دئیه مسئله یه یاناشساق، کونفئدرال فیکیرلری نماینده لیک ائدنلر اؤز فیکیرلرینه اویقون آذربایجان تشکیلاتلارینی یاراتمالیدیرلار. بونلارا باخمایاراق فارس تشکیلاتلاری (ایران سراسری تشکیلاتلاری) ایچریسینده دورقونلوق بو تشکیلاتلاری ایران ممالیکی محروسه سینین ایسته گینه جاواب وئرمکده زور دوروما گتیریب چیخارتمیشدیر.. بو مسئله یه چیخیش یولو تاپماق اوچون کئچمیش فارس تشکیلاارینا پارالئل (مووازی) گئنه ده فارس تشکیلاتلاری اولان اتحاد جمهوری خواهان ايران و جمهوری خواهان لائیک و دموکرات ایران آدلاری آلتیندا یئنی گؤتوروشمه لر تهراندا ایسلام جومهوریتی حاکیمیتینی گؤتوروب یئرینه اوتورماق اوچون فورمالاشمیش گؤرونور. آذربایجان میللت  مسئله سینی فئدرال آذربایجان دئموکرات حرکاتی آدی ایله مطرح ائتمکده بیر سیرا آذربایجانی سئون فئدرالیست شخصلرین  کناریندا  پاریسده  ایجلاسی کئچن جمهوری خواهان لائیک و دئموکرات ایران آدلی فارس قوروپلاشماسیندان ناراضی اولان آذربایجانلیلارین اولماسیدیر. بیلیندیگی کیمی آذربایجان میللی حرکتی آدی اؤز دامغاسینی ایچریده داوام  میللی حرکته وورموش و بو حرکتی ایدئولوژیلر ایله قیسیتلاماغا ایمکان یئری بوراخمامیشدیر.

دئمک، کئچمیش ایران سراسری  تشکیلاتلاریندان اولان بیر سیرا اینسانلار (1: اؤز ایدئولوژیلریندن تعویض وئرمین، آنجاق میللی مسئله یه اؤنم وئرن، 2: پاریس ایجلاسیندان ناراضی قالان، آنجاق فارس تشکیلاتلاریندان موقتی اولاراق اؤز باغلارینی قوپارتماق ایسته مه ین، بلکه ده  بیر سیاسی ژئست حالیندا) بیر بیرلری ایله رابیطه قوراراق حرکت ائتمیش گؤرونورلر. دئمک، ایکینجی قوروپ کئچمیش فارس تشکیلاتلاریندا اؤز موقعلرینی ساخلایاراق بو حرکته ایقدام ائتمیش گؤرونور، اؤزلری ده بونو اینکار ائتمیرلر. هر حالدا فارس تشکیلاتلاری ایله ویداعلاشمادان بو شخصلرین آذربایجان میللی مسئله سینه اوز گتیرمه لری و بیرینجی قوروپ ایله فئدرال آذربایجان دئموکرات حرکاتی باشلیغی آلتیندا پلاتفورم وئرمه لرینین  مثبت و منفی نتیجه لری اولا بیلر.

1) ) منفی: فارس اولمایان میللیتلری بیر داها دولاییلی فورمادا اوزون زامان ایچریسینده  فارسچیلیق سیاستی کؤلگه سی آلتینا سالماق.

2) مثیت: آذربایجان میللت و ایراندا میللیتلر مسئله سینی فارس تشکیلاتلاری ایچینده اولان غیر فارسلارا آشیلاماق واسیطه ایله اونلاری اؤزمنلیک و کیملیکلرینه دوشوندورمک و اونلاری اؤز فیکیرلرینه اویقون میللی تشکیلاتلارینی یاراتماق فیکیرینه اولقونلاشدیرماق و فارس تشکیلاتلارینین ایران ممالیکی محروسه سی اوزره فیکیر هژمونیسینه سون قویماق.

هر حالدا بو اوسته کی مسئله لر آذربایجان میللی مفکوره سینه اؤنم وئرن بو تشکیلاتدا اولان اینسانلارین چاباسیندان آسیلی اولاجاق. میللی مفکوره لی اینسانلار بو ملغمه (فیکیر قاریشیقلیغیندا اولماق) بیچینده اولان تشکیلاتی آذربایجانلیلاشدیرمالی و میللت منافعینه خدمت ائتدیرمه لیدیرلر. آذربایجان میللت مفکوره سی اؤز آغیرلیغینی بو تشکیلاتدا قویا بیلرسه، فارس تشکیلاتلاریندان بیر ژئست کیمی بو حرکته قاپیلانلار یا فارس تشکیلاتلاریندان ویداعلاشاراق بو یولدا جان و باش ایله خدمت ائتملی اولاجاقلار یا دا میللی حرکتده اؤزلری اوچون یئر گؤرمه یرک فارس تشکیلاتلارینا اللری آیاقلاریندان آغیر گئری قاییتمالی اولاجاقلار.

اوسته کی فیکیرلریمیزه اساسلاناراق بو تشکیلات آدینا تقدیم اولونموش پلاتفورم اوزره فیکیر یئریتمه گه ایندیلیک ائحتیاج گؤرونمور.

 

 

ایشیق سؤنمز. 1.11.2004

 

میللی مسئله