آذربایجان دئموکرات فئدرالیستلری!

بیلیندیگی کیمی آذربایجان سایتلاریندا آذربایجان فئدرال- دئموکرات حرکاتی عنوانیندا موقت پلاتفورم دئیه بیر سایدا گونی آذربایجانلیلار طرفیندن  بیر تشکیلات پروقرامی گونی آذربایجان و ایران ایجتماعییتینه تقدیم اولموشدور. بو پروقرام اؤزلوگونده موثبت اولماسینا باخمایاراق و پروقرامین بعضی مقاملارینی بیرلیکده گؤزدن کئچیرمک ایستردیک، باشلیغیندا اوخویوروق: آذربایجان فدرال- دموکرات حرکاتی نین موقت پلاتفورمو.

اوست کی باشلیقدا آذربایجان فئدرال - دئموکرات حرکاتی ایفاده سینی اوخودوقدا بیر چوخ اینسانلار اوچون ایکی مسئله طرح اولونور:

 1) - ائله بیل (گونی) آذربایجان حاکیمیتی وار، بونون دئوکرات بیر سیستیم ایله ایداره اولونماسی آرزو ائدیلیر.

 2) آذربایجان فئدرال : گونی آذربایجان اؤز موستقیللیغینا قوووشدوقدان سونرا قوزی آذربایجان ایله فئدرال صورتده بیرله شه جکدیر.

 بیر آز مووضوع اوزره دوراقلادیقدا نه گونی آذربایجان حاکیمیتی وار، نه ده پلاتفورمون ایچریگیندن بللی اولدوغو کیمی آذربایجانین ایچ ایشلری دئیه فئدرال بیر سیستیم نظرده توتولور. دئمک بو ایفاده آذربایجان فئدرالچیلار تشکیلاتی (دئموکراتچیلیق آسپئکتلری ایله) یئرینه ایشله دیلمیشدیر. بو پلاتفورمون آدینا گؤره دئموکراتیک دوشونجه یه صاحب و ایرانین فئدرال بیر سیستیم ایله ایداره اولونماسینی آرزو ائدن آذربایجانلیلار (ایران ممالیکی محروسه سینده سؤز صاحبی اولماق ایسته ین آذربایجانلیلار) بو تشکیلاتی اؤزلرینین بیلمه لیدیر. دئمک بو تشکیلات ایران ممالیکی محروسه سینده فارس شوونیسمینه قارشین موباریزه ائتمه،  میللی و مدنی حاقلارین بیر فئدرال- ایران ایچریسینده نایییل اولاجاقلارینا اینانیر. گئنه ده اوخویوروق:

" ايرانليلارين موعاصير تاريخى، بير طرفدن اونلارين آزادليق و اجتماعى عدالت يولوندا موباريزهلرىنين تاريخى،  و   ديگر طرفدن تورک، کورد، عرب، بلوچ و تورکمن ميلتلرىنين  ميلى- آزادليق موباريزه لرىنين تاريخىدير."(1).

بو اوستکی عبارتده > ايرانليلارين موعاصير تاريخى، بير طرفدن اونلارين آزادليق و اجتماعى عدالت يولوندا موباريزه لرىنين تاريخى،< ایفاده سی ده بیر پوپولیستی فیکیر داشیماقدادیر. دئمک بیر مملکتین تاریخی بوتون او مملکتده کی نیظام، اینتظامی و باش وئره حادیثه لری بیرلیکده ایحاطه ائتمه لیدیر. دئمک تاریخ یالنیز آزادلیق و عدالت یولوندا موباریزه اوچون یازیلمیر. بو آسپئکتدن باخیلیرسا، بو مملکت تاریخی دگیل، بو بیر سیاسی تشکیلات ویا تشکیلاتلاین کئچدیگی و اونلار اوچون اؤنملی و اهمیتلی گؤرونن نقطه لردیر. بئله لیکله بو تاریخ مملکت چاپیندا باش وئرن واقعه لرین بیر بؤلومونو عکس ائده بیلر. مملکت تاریخی ایسه، حاکیمت و سیاست میدانیندا اولان قوروپلاشمالاری ایچرمکله برابر بیر مملکتده اؤنم داشییان، تاریخچی لرین دیققتینی اؤزلرینه جلب ائدن بوتون اولایلاری ایچرمکده دیر. دئمک ایراندا فارس شوونیسمینه و مرکزی حاکیمته خدمتی اولان قوروپ و تشکیلاتلارین یانلیش عمللری و فارس اولمایان ائتنیکلرین او جومله دن 1946 آذربایجان اوشاقلارینین درسلیک کیتابلارینین اودا چکیلیب یاندیریلماسی دا  تاریخ چیلر بو اولایی اینعیکاس ائتدیره بیلسه لر، ایران موعاصیر تاریخینین بیر گوشه سیدیر. بو پلاتفورمون گیریشینده ایران ممالیکی محروسه سی نین کثیرالملله اولدوغو قبول ائدیلدیگینه باخمایاراق ایران تورکلرینین فئدراتیو دولتی باشلیغی آلتیندا 2 اینجی و 3 اونجو نبدلرینده  میللی حوکومت کلمه سی یئرینه یئرلی حکومت ایفاده سی آذربایجان میللت مسئله سینی بویاقسیزلاداراق (کم رنگ ائده رک) آذربایجان میللت مقددراتینی  تعیین ائتمه ایمکانینی -دییلمه سه ده -  مرکز حاکیمته بوراخمیش اولو. بونون یانی سیرا ایران کیمی مرکزیتچی فیکیرلر ایله یوغرولموش توپلوملاردا بو فئدرال یئرلی حاکیمتلرین تضمینی کیمدیر؟ بو مسئله اوزره بیرلشمیش میللتلر تشکیلاتی عهده لیک گرتوره جک می، یوخسا تهراندا بیر چئوریلیش واسیطه سی ایله مرکز حاکیمتی بو یئرلی حاکیمتلری مرکزیتچی گوجلر واسیطه سی ایله دییشمه گه و گئنه ده قاپی کئچمیش دابانی اوزره فیرلانماغا باشلایاق می؟  بیرلشمیش میللتلر تشکیلاتی نین تضمیناتی اولدوغو دورومدا گئنه ده فارس اولمایان میللتلرین یئرلی حاکیمتلری غصب ائدیلیرسه (روسیه فئدراسیونوندا چئچنلرین حاکیمیتی کیمی) بیرلشمیش دولتلر تشکیلاتی نه ائده بیله جک؟ دئمک، ایران ممالیکی محروسه سینده حتی بیر فئدرال سیستیم ده میللتلرین ایستیقلاایتیندن و ایسته سه لر کؤنوللو بیرلشمه لریندن اورتایا گلمه لیدیر. بو حالدا ایران ممالیکی محروسه سی اوچون فئدرال دگیل، کونفئدرال (کؤنوللو بیرلشمیش میللتلر اساسیندا) بیر سیستیم یارادیلمالیدیر. بو کونفئدرال سیستیمده ازیلمیش میللتلر اوچون نه مرکزیت تهلوکه سی، نه ده زامان گئدیشی ایله فارس اولمایان دیل و مدنیتلر علیهینه ضرره تهلوکه سی وار. دئمک، مودرن اولدوقا میللتر، میللی حاکیمیتلر اساسیندا مودرن اولمالیییق نه یئرلی حاکیمیت لر.

قایناق:

1        جنبش فئدرال دمکرات آذربایجان، موقت پلاتفورم

ایشیق سؤنمز 10102004

 

میللی مسئله