فارس تشکیلاتی سازمان فداییان خلق ایران (اکثریت) و آذربایجان میللت مسئله سی!
بیلیندیگی کیمی ایران ممالیکی محروسه سینده فارس اولمایان میللتر آراسیندا میللی بیلینجین گلیشمه سی ندنی ایله فارس تشکیلاتلاری اؤز کادرولاری آراسیندا هئژمونیلرین اللریندن وئرمه سینلر دئیه ایران ممالیکی محروسه سینده میللتلر مسئله سینی دئموکرات مئآبلیق ائده رک سراسری تشکیلاتلار( اوخو: فارس تشکیلاتلاری) باشلیغی آلتیندا گؤز آلتیندا توتوروق دیه رک ایران ممالیکی محروسه سینده کی فارس اولمایان میللتلر اوچون قیوم مئآب اولماغا چالیشیرلار. هرکسی تانیدان اونون شخصیتی اولدوغو کیمی تشکیلاتلاری دا تانیدان اونون اورگان دیلی و ایجتماعیته مراجعت ائتمک اوچون ایشلتدیگی گئنه ده رسمی دیلی دیر. بو باخیمدان ایران ممالیکی محروسه سینده کی سراسری دئیه بوتون جریان و تشکیلاتلاری او جومله دن »سازمان فدائیان خلق ایران (اکثریت) ی ده تانیدان اونون یایین باسین اورگانی و ایجتماعیته بیر سیاسی تشکیلات اولاراق اؤز گؤروش و نظرلرینی بیلدیرمک وسیله سی اولان فارس دیلیدیر. دئمک، فارس تشکیلاتلاری ایران ممالیکی محروسه سینده کی فارس اولمایان میللتلره قیوم مئآب گؤرونمک اوچون اؤزلرینی فارس اولمایان ایران ممالیکی محروسه سینده کی میللتلره ده دئموکرات پوزو ایله مطرح ائتمکلرینه باخمایاراق ایران ممالیکی محروسه سینده کی فارس اولمایان میللی توپلوملارا میللیت مقوله سینده یئنی بیر سوغات وئره جک گؤرونمورلر. بو تشکیلاتلار یاراندیقلاری بیر گوندن بونلارین قوروجولارینین بیر چوخو آذربایجانلی اولمالارینا باخمایاراق - ایستر ساغ، ایستر سول اولسون - ایران ممالیکی محروسه سینده فارس دگیرمانین فیرلانماسی اوچون اؤز آرالاریندا رسمی ائتدیکلری فارس دیل و مدنیتی و غیر رسمی ائدیلن ایران ممالیکی محروسه سینده کی فارس اولمایان دیل و مدنیتلر آچیسیندان حرکت ائده رک ایران ممالیکی محروسه سینده دیل و مدنیتلرین یوخ اولماسینا فارس شوونیستلری ایله کئچن 80 ایلده شوونیستلیک مقوله سی اوزرینده دایانمادیقلاری و میللی ظلم قارشیسیندا سس سیز قالدیقلاری اوچون اؤزلرینی فارس شوونیتلریندن آییرما قودرتینه صاحیب اولمامیشلار. بو تشکیلاتلار کئچمیش ایللرده کی یایین باسین اورگانلاری و رسمی دیل دیئه فارسجانی فارس اولمایان میللی توپلوملاردا دا یئدک چکدیکلری و بوگونکو پروقراملاریندان دا گؤره جه گیمیز کیمی بیر یالانچی دیلی یاغلی وقولو باغلی پهلوانلار کیمی ایران ممالیکی محروسه سی نین دئموکراتلاشما سورجینده بیر دئموکرات تشکلات کیمی گؤرونه بیلمه یه جکلر. بو باخیمدان بیز بو فارس تشکیلاتلاریندا اولان آذربایجان تورک اوغول و قیرلارنی اؤز دونیا گؤروشلرینه اویقون فارس تشکیلاتی دگیل، موستقیل تشکیلاتلارینی یاراتماق اوچون زامانی درک ائده رک فورستی الدن وئرمه سینلر.دئیه چاغیریریق. دئمک، گونی آذربایجانلیلار بوگون مشروطیت حرکاتیندان سونرا میللی وموستقیل تشکیلاتلارین اولادیغینین کؤتگینی یئییرلر دئسک یانیلمامیشیق. ایران ممالیکی محروسه سینده میللتلر مسئله سی قارشیسیندا دئموکرات مئاب پوزو توتان سازمان فداییان خلق ایران( اکثریت) باشچی سی فرخ نگهدارین 1990 اینجی ایلین 20 ژانویه قیرقینیندا تبریزلی صمد دیژبانا سویتلر سیستیمینه اعتراض ائتدیگی اوچون »ناسیونالیست بازی در نیار« دئدیگی هر ایل 20 ژانویه ده بو مسئله نی ائشیدنلر اوچون تازالانیر. دئمک دئموکراتلیق ایددعاسیندا اولان فارس سراسری تشکیلاتلاری اؤز دئموکرات اولدوقلارینی عمل ده گؤسترمه لیدیرلر. بو دا آشاغیداکی پرینسیبلره اساسلانمالدیر:
1 فارس تشکیلاتلاری نین باشیندا اولان یئتنکلی فارس اولمایان اینسانلار، آنجاق فارس دیل و مدنیتینه قوللوق ائدنلر ایلک اؤنجه اؤزلرینی آزاد ائتمه گه چالیشاراق اؤز دونیا گؤروشلرینه اویقون آذربایجان تشکیلاتلارینی یاراتمالی، ب:) یئتنک سیز قوللار دا اؤزلرینی فارس تشکیلاتچیلیق قوللوغوندان آزاد ائده رک اؤز گؤروشلرینه اویقون آذربایجان تشکیلاتلارینا قوشولمالیدیرلار.
2 هر میللته منسوب اولان تشکیلات ایستدیگی نیظام و اینتیظامی ایران ممالیکی محروسه سینی کثیرالملله تانیدیغی اوچون ایلک اوول اؤز میللتینه باغلی تشکیلاتلاری ایله بؤلوشه رک، اؤز میللتینین صلاح و مشورتلرینی اؤیرندیکدن سونرا ایرانین گله جه گی اوچون تئز وئرمه لی و تئزلرینی تئوریزه ائتمه لیدیرلر.
3 ایران ممالیکی محروسه سینده دیل و مدنیت باخیمیندان ائتنیک سرحدلر بللی اولمادان بو دیل و مدنیتلرین قوروناجاغیندان و میللی مدنی حاقلار وئریله جک سؤزونه اینانماق گئرچکلیکدن اوزاق گؤرونور.
4 میللتلر مقوله سینی قبول ائدن هر بیر ساغلام فیکیر یئریتمه قودرتینه صاحیب اولان اینسان، دونیامیز کامپیوتئر عصری، دیل و مدنیتلرین یاشاماسینا داییر دیرنیش چاغی اولدوغو اوچون موختلیف مییللتلر آراسیندا (ایران کثیر الملله) موشتریک دیل و سراسری تشکیلاتلاردان سؤز ائده بیلمز.
اوسته کی پرینسیبلری گؤز اؤنونه آلاراق ایران سراسری تشکیلاتلاریندان سؤز آچانلار یا میللیتلر مسئله سینی درک ائتمه میشلر، یا دا واقعیتلر قارشیسیندا ناچار قالاراق دئموکرات مئآب پوزو ایله میللیتلر مسئله سینی دوزگون یولوندان آزدیرماغا چالیشاراق فارس اولمایان دیل و مدنیتلرین وارلیغینا بیر اینسان کیمی دوشوننلره سراب گؤسترمک ایسته ییرلر(اللرینه سوسو وئرمک). بو دا میللی بیلینجی اولان اینسانلار اوچون کیمسه نین دونیا گؤروشوندن آسیلی اولمایاراق یول وئریلمز خطا ساییلمالیدیر.
سازمان فداییان خلق فارسین (اکثریت) کنگره نامه سینه گلدیکده ایران ممالیکی محروسه سینده کی میللتلر مسئله سیندن نه لر تشخیص وئرمیش، بو او تشکیلاتا موبارک اولسون. آنجاق تأکید ائتدیگی مسئله لرین بعضی پاساژلارینی بیرلیکده گؤزدن کئچیرمکده فایدا وار، اوخویوروق:
"۳-۱) ما از حق تعيين سرنوشت همه مليت های ايران دفاع ميکنيم و همزمان بر پيشنهاد برنامه ای خود مبنی بر تحقق اين حق در شکل گذار کشور به ايرانی دموکراتيک و واحد و عاری از تبعيض ملی و قومی پای می فشاريم. بر همين پايه، ما بر مخالفت صريح با هر نوع ستم ملی و مبارزه با اعمال کنندگان اين ستم، و نيز نقد انديشه ها و برنامه های استقلال طلبانه از سوی هر جريان ملی گرا تاکيد می ورزيم."(1).
اوسته گؤروندوگو کیمی مارکسیستلرین کلیشه ائتدیکلری »حق تعیین سرنوشت« عنوانی دورمادان بوتون ایران سراسری سول تشکیلاتلاریندا بیر ساققیز کیمی چئینه نیر. آنجاق بونلار بو کلمه لری ایفاده ائتدیکده تشکیلاتسیز ازیلمیش میللتلر اوچون »حق تعیین سرنوشت« اولماز مسئله سینه میللی مسئله نی درک ائتمه دیکلری اوچون یا دیققت ائتمیرلر، یا دا اینسانلاری حمیق تشخیص وئره رک یورولمادان اؤزلری اوچون بو ایچی شعاری بیر طوطو کیمی تیکرار ائدیرلر.
دئمک، اؤزلرینی یالنیز فارس میللتی و فارس نوکرچیلیگی دگیل، فارس اولمایان میللتلره ده باغلی گؤرنلر نه اوچون تورک، کورد، عرب، تورکمن، بلوچ و ساییره میللت اولادلاری اولاراق فارس تشکیلاتلارینی بوراخاریب اؤز دونیا گؤروشلرینه و میللتلرینه اویقون سیاسی، میللی و مدنی موستقیل تشکیلاتلار یاراتماق ایسته میرلر؟ ایرانیت (اوخو: فارسلیق) مقوله سی گؤزلرینی توتموش مو؟ گئنه ده اوخویوروق:
"۳-۳)ما مدافع تحقق پروژه فدراليسم در ايران هستيم و در همين رابطه هم ناقد ديدگاههای تقليل گرايانه از مفهوم فدراليسم (توزيع قدرت در سطح استانها و شهرها و در نظر نگرفتن ويژگی تعيين کننده ملی برخی مناطق کشور) و هم منتقد آراء تفکيک گرايانه ناسيوناليستی از آن ( تحت پوشش فدراليسم، تفکيک مصنوعی و ماجراجويانه هم پيوندی های تاريخاً شکل گرفته در ايران) هستيم."(1)
اوسته گؤروندوگو کیمی بونلارین فئدرالیسم آنلاقلاری دا ایران ممالیکی محروسه سینده بعضی میللی ویژه لیک نظره آلینمایاراق (باخ: در نظر نگرفتن ويژگی تعيين کننده ملی برخی مناطق کشور) شاهلیق سیستیمینده فارسلاتماق اوچون ائتنیک دابانا اساسلانمایان و زوراکیلیقلا بؤلونموش اوستان و شهریستان سوییه سینه دوشورولموش اولور (باخ. اوسته: توزيع قدرت در سطح استانها و شهرها).
بو باخیمدان سلطنت طلبلر ایله طرف حئساب اولماق بو خالق مودعیلرینه بئل باغلاماقدان داها یاخشی اولاردی (1). بیلیندیگی کیمی خالق سلطنت طلبلرین کیم اولدوغونو بیلیر. بئله لیکله دونیا ایجتماعیتی ده اونلاری 55 ایل پیس سابقه لری ایله یاخشی تانیشدیر.
دئمک، اوسته گؤروندوگو کیمی صاباح قاشقای و خوراسان تورکلری اوچون اؤزلرینی ایداره ائتسینلر دئیه خودموختار بؤلگه لرین یارادیلماسی ایستنیلیرسه و یا آستارا، همدان، قزوین و ساوه و ساییره آذربایجانا بیرله شیک ائتنیک آذربایجان تورپاقلاری دئیه ساکینلری قاتیلماق ایسترلرسه، آقالار ایندیدن اتهاملارینی حاضیر ائتمیش گؤرونورلر (باخ اوسته: تحت پوشش فدراليسم، تفکيک مصنوعی و ماجراجويانه). گئنه ده اوخویوروق:
"... ۳-۴) ما مروج و مدافع هم پيوندی های تاريخی ساکنان ايران و اشتراکات اقتصادي، اجتماعی و فرهنگی کنونی آنان می باشيم و در مخالفت با تفرقه افکنی ها و نقار آفرينی های ملي، با هر نوع برتری جوئی ملی در اشکال پان ايرانيسم، پان ترکيسم، پان کرديسم و پان عربيسم و غيره مبارزه می کنيم"(1).
بیلیندیگی کیمی بوگونکو ایران ممالیکی محروسه سینده فارس دیل و مدنتینه اساسلانمیش بیر مرکزی سیستیم وار. بو سیستیم دیل و مدنیت باخیمیندان فارس اینحصاریندادیر. نتیجه اعتیباری ایله زامان گئدیشی ایچریسینده ایقصاد و سرمایا دا فارس اینحصارینا کئچه جک گؤرونور.
دئمک، بو »اشتراکات اقتصادی، اجتماعی و فرهنگی« نی »مروج و مدافع« ائدنلر نه اوچون آشکارا ایران فارس دیل و مدنیتی اساسیندا اولمالیدیر دئمک ایسته مه یه رک عوامفریبلیک ائتمه گه چالیشیرلار؟ گئنه ده اوخویوروق:
"... ۳-۵) ما از ضرورت موجوديت احزاب سراسری برای کل ايران دفاع کرده و بر اين واقعيت که احزاب دموکراتيک سراسری باورمند به حل مسئله ملی در ايران، مؤثرترين ابزار برای تأمين تفاهم عمومی در گذار به موقعيت دموکراسی مبتنی بر برابری حقوق ملی در کشور اند، تاکيد داريم"(1).
فارس سراسری تشکیلاتلار مسئله سینده »سازمان فداییان خلق فارس« یالنیز دگیل، بوتون فارس تشکیلاتلاری فارس ایستعمارینی فارس اولمایان بؤلگه لرده سوردورمک اوچون قرارلیدیرلار. بونا قارشین فارس اولمایان میللتلر نه دئیه جک؟ او دا گله جگین موضوعسودور. گئنه ده اوخویوروق:
".... ۳-۶) ما حق جريان های ملی در ايجاد تشکل های فرهنگی و سياسی محلی را محترم می داريم و همزمان هر انديشه و اقدامی که بخواهد سياست و برنامه در ايران را صرفاً با معيارهای ملی تعيين کند، به نقد می کشيم"(1).
بو مسئله نی فارسلار اوچون فارس دیل و مدنیتینی قودرتدن سالاجاقلار دئیه یازسایدیلار، بلکه ده بو مسئله اوزرینده بیر تمکین ائتمک اولاردی. دئمک، بیر یاندان ایران ممالیکی محروسه سینی کثیر الملله تانیر، باشقا یاندان فارس اولمایان دیل و مدنیتلری محلی دئیه اونلار اوچون محللی مدنی و سیاسی تشکیلاتلار یارانماغی ائحترام ایله قارشیلاییرلار. بودا بیژن جزنی، بهروز دهقانی، مرضیه اوسکویی، علیرضا نابدلین و مینلر آرمان یولوندا شهید اولانلارین فارس تشکیلات یولداشلارینین اینسانلیغی! عجب ائحترام!
سولطانعلی کیشیدن بیری سوروشدو: زیرتانعلی عمی ده ده وین آدی نه دیر؟
سولطانعلی کیشی جاواب وئردی: اؤز آدیمی یاخشی ایفاده ائتدین کی، ده ده مین ده آدینی سوروشورسان؟
هر حالدا بو دا سازمان فداییان خلق فارس (اکثریت) ین کنگره تصویبنامه سی دئیه تاولاما نامه سی ایدی. موبارکلری اولسون.
قایناقلار:
1 هئيت سياسی – اجرائی سازمان فدائيان خلق ايران ( اکثريت )، بيست پنجم دی ماه سال ۱۳۸۳ خورشيدی، برخی ارزیابی های عمومی، پاره ای استنتاجات مشخص و بخشی از تأکیدات ما در عرصه مسئله ملی در کشور: http://www.iran-chabar.de/1383/11/01/aksariyat831101.htm
2 حزب مشروطه ایران، قطعنامه در عدم تمرکز و حقوق اقوام و مذاهب ایران:
ایشیق سؤنمز 20.01.2005