گونئی آذربایجان میللی فعاللارینا!
سوروشدوم: آدین نه؟
ائشیتدیم: اسیر!
دئدیم: کیملیگین نه؟
ائشیتدیم: اسیر!
دئدیم: مملکتین، وار دؤولتین؟
ائشیتدیم: اسیر! اسیر بیر میللتین نه یی اسیر!
سایقیلی وطنداشلار،
بیلیندیگی کیمی یاخین شرق مملکتلری او جومله دن ایران ممالیکی محروسه سی و بو ممالیکی محروسه نین ایچریسینده یئر آلمیش گونئی آذربایجان تورپاقلاری امریکا بیرلشمیش شیتاتلاری نین بؤلگه یه نظره آلمیش یئنی پلانلارینا اساساً سیاسی دوزن باخیمیندان دگیشیمه اوغراماق زوروندا قالاجاق گؤرونور. بو دگیشیم 11 سئپتامبر 2001 میلاد ایلینده آمریکا بیرلشمیش شتاتلاریندا تئرور اولایلاری حیاتا کئچدیکدن سونرا دونیانین بیرینجی گوجو ساییلان آمریکا بیرلشمیش شتاتلاری طرفیندن نظره آلینمیش و افغانیستاندا طالیبان گئریچیلیک و بن لادن تئورچو داورانیشلاری علیهینه دئیه باشلامیش اولدو.
بونلارا باخمایاراق افغانیستانداکی ایسلام حاکیمیتی طالبانلار ایله قارشی قارییا دورارکن اؤزبک عبدالرشید دوستوم موخالیف قوروپلار آراسیندا نیظامی آچیدان تعیین ائدیجی بیر مقاما چاتمیش ایدی. بو آرادا کئچمیشلری موغوللارا دایانان وشیعه اولان هزاره آزلیغی دا کئچمیشده فارس و پشتون باسقینلارینا معروض قالدیقلاری اوچون عبد الرشید دوستوما اومود باغلامیشلاردی. بونلارا باخمایاراق طالبانلار حاکیمیته گلر گلمز، عبدالرشید دوستوم، اؤزبک حاکیمیتی افغانیستان نین قوزئی بؤلگه سینده حضور ایچینده اولماسینا باخمایاراق عبدالرشید دوستومون معاوینی ساییلان عبدالملک پهلوان آدلینی بیر سیاست اولاراق فارس و پشتون گوجلری عبدالرشید دوستوما قارشی قویدولار. بئله لیکله عبدالرشید دوستوم اؤز میللی تشکیلاتی نین ایچریسینده مغلوب اولاراق ایلک آشامادا اؤزبکیستانا و سونرا اورادان تورکیه یه قاچماق زوروندا قالدی. بئله لیکله میللی بیلینج و شوعورو چیچکلنمکده اولان اؤزبک، تورکمن و هزاره لرین اومودلاری اؤزونو دوغرولداجاق گؤرونمه دیگی اوچون داها آرتیق دونیا ایجتماعیتی ایله کونتاکت قورماغا دوشونمه دیلر. بونلارا قارشین کئچمیشده حاکیمیتین دادینی بیلن فارسلار افغانیستاندا داغینیق بیچیمده یاشامالارینا باخمایاراق دورمادان تشکیلاتلاناراق آوروپا و آمریکا بیرلشمیش مقاملاری ایله دیپلوماتیک کونتاکت قورماغا باشلادیلار. بئله لیکله آمریکا بیرلشمیش شتاتلاری طالبان حاکیمیتینی دگیشمک ایسته ر گن فارسلار اؤزلرینی آمریکا و متحدلرینه مطرح ائتمیش اولدولار. فارسلارا قارشین اؤزبک و هئزاره لر فورستی الدن قاچیردیقلاری اوچون عراق تورکمنلری کیمی افغانیستان حاکیمیتی قورولوشوندا اتکین رول اوینایا بیلمه دیلر. نتیجه ده حاکیمیت اعتیبارینی ایتیرمکده اولان فارسلار کئچمیش موقعیتلرینی قوروموش اولدولار. بئله لیکله فارسچا و پشتونچا افغانیستاندا ایکی رسمی و سراسری دیل تانیندیقلارینا باخمایاراق اؤزبکچه یالنیز افغانیستان نین قوزئی بؤلگه سینده رسمی قبوللوق گؤره بیلدی. بیلیندیگی کیمی عبدالرشید دوستوم افغانیستاندا بوگون مدافعه ناظیری اولماسینا باخمایاراق اؤزبکچه هله ده افغانیستانین اؤزبکلر یاشایان، قوزئی بؤلگه لرینده، مدرسه لرده رسمی اولاراق درس وئریلمیر. آنجاق قونشو دؤولتلردن (اؤزبکیستان و تورکمنیستاندان) کیتاب کؤمک آلاجاقلاریندان سؤز و صؤحبت گئدیر. بو دا آمریکانین اورادا اولماسی ایله اؤز عکسینی تاپمیش اولور دئیه دوشونمه لی ییک. باشقا حالدا بلکه گئنه ده اؤزبکلر بیر شئی الده ائده بیلمه یه جک ایمیش دئسک ده، یانیلمامیشیق. عیراقداکی تورکمنلر مسئله سینه گلدیکده تورکمنلره کئچمیشده عبداللطیف آدلی بیر تورکمن نین ائتدیگی خیانتی نتیجه سینده بیر داها موجازات اولدولار. بیلیندیگی کیمی کئچمیشده عیراقدا تورکمنلر ده کوردلر کیمی ایصطلاحاً سوسیالیستی اینقلاب اولدوقدان سونرا اؤز دیللرینده یازیب اوخوما حاققینا مالیک ایدیلر. اوسته آدی چکیلن عبدالطیف، صدام حسین حاکیمیتینده پوست و مقام صاحیبی اولدوغو زامان تورکچه اوخومانی عربچه رسمی دیلدیر دئیه تورکچه اؤیرنمک تورکمنلره بیر مانعچیلیک اولار دئیه سیاسی خوش خیدمتلیک ائده رک تورکچه نین اوخونماسی تورکمنلر اوچون گرکسیزدیر دئمیش. بو مسئله عرب شوونیستلری نین مزاجلارینا خوش گله رک بو مسئله نی اولدوقچا خوش قارشیلامیشلار. بئله لیکله تورکجه مدرسه لردا داها درس وئریلمه میش و قاداغان اولموش. بونلارا قارشین کوردلر او زامان دیل و مدنیت آزادلیغینی الده ائتمه لرینه باخمایاراق داها آرتیق حاقلار الده ائتمک اوچون چالیشمیشلار. نتیجه ده چوخ آزار و اذیت چکدیکدن سونرا ایندیکی دبیلیو بوشون آتاسی جورج بوش زامانی کورد تشکیلاتلاری نین آمریکا مقاملاریندان ایستکلرینه اساساً آمریکا قوزئی عیراغا قارشین عیراق اوچاقلارینا یاساق قویموش و آمریکا هاوا گوجلری عیراغین قوزئینی صدام حاکیمیتدن دوشن گونه دک قوروما آلتینا آلمیشلار. کوردلر بو قورونما آلتیندا اولدوقلاری زامان تشکیلاتلانمانین یانی سیرا اؤزلری اوچون محللی دؤولت و نیظام و اینتیظام یاراتماغا چالیشمیشلار. کوردلرین بو مقاما چاتمالارینا قارشین تورکمن سویداشلاریمیز عرب و کوردلر آراسیندا یئرلشدیکلری و عبداللطیف بگین ائتدگی خیانت نتیجه سینده اؤز دیللرینده اوخوماقدان محروم اولدوقلاری اوچون عرب و کورد خالقلاری آراسیندا اریمه نین یانی سیرا فیکیر و اینانج باخیمیندان شیعه و سنی دئیه عیراقداکی شیعه و سنی عربلره یاخینلاشمانی اؤز میللی کیملیکلرینه داها اوستونلوک وئرمیشلر، سونرا بیر تاخیمی تورکیه و بیر تاخیمی آیت الله سیستانی دئیه عراقدا حاکیمیت دگیشیکلیگی اولمادان اؤنجه حاضیرلیق گؤرمک یئرینه بیر دره ایکی سره اولاراق ایکیه بؤلونموشلر. بیر عیدده سی تورکمن جبهه سی دئیه تورکیه دؤولتی اومودونا اوتورموش، بیر عیدده سی ایسه آیت الله سیستانی بیزه مرحمت ائده جک دئیه اینشالله و ماشالله ایله مشغول اولموشلار. بو آرادا تورکیه دؤولتی کورد مسئله سی عجوباتیندان عراقدا ائتنیک دابان اوزره گلیشمه لر ایشینه گلمز دئیه تورکیه بؤیوک میللت مجلیسی، تورکیه قارایوللاری اوزریندن آمریکا اوچون عیراغا گیرمه سینه راضیلیق وئرمه میش. تورکیه یه آرخالانمیش تورکمنلر ایسه تورکیه سیز آمریکا عیراقدا ائتنیک دابانا اساسلاناجاق بیر حاکیمیتین قورولاجاغینا ایجازه وئرمز و بو گلیشمه لر کئچیجیدیر دئیه اؤزلرینی آلداتماغا چالیشمیشلار. دئمک، تورکیه و تورکمنلر بو گلیشمه لره سئیریجی قالدیقلاری اوچون کرکوکده کی تورکمن توپلومو آمریکا بیرلشمیش شتاتلاری طرفیندن عیراغا نظره آلینمیش پلاندان فایدالانا بیلمه میش دئسک، یانیلمامیشیق. میللی مسئله و ایداره ائتمه باخیمیندان بو دگیشیکلیکلره یاخین کئچمیشده بؤلگه میزده تانیق اولموشوق.
اوسته کی دگیشیکلیکلره باخمایاراق آمریکا بؤلگه ده داها آرتیق دگیشیکلیکلر ائتمک ایسته ییر. دونیا یایین باسین اورقانلاریندان آنلاشیلدیغی کیمی بوگون سیرا ایران ممالیکی محروسه سینده کی تهران حاکیمیتی نین دگیشمه سینه چاتمیش. تهران حاکیمیتی ایسه، ایستر میللی مسئله لره حلل یولو قویمادیغی، اؤز آنا یاساسیندا تانیدیغی حاقلارا عمل ائتمه دیگی و اوسته لیک بو ممالیکی محروسه ده شاه زامانی کیمی فارس ایستعمارچی سیستیم حاکیم اولدوغو، فارس اولمایان میللتلر اوچون حقوق برابرلیگی تانیمادیغی، و فارسلار اوچون آتوم انرژیسی و سیلاحی تؤرتمه ایتتیهامی ایله اوزلشدیگی اوچون، دونیا ایجتماعیتی نظرینده اؤز حقانیتینی ایتیرمیش گؤرونور.
تهران حاکیمیتی نین دونیا ایجتماعیتی نظرینده کوپونونون سونا چاتدیغینی نظره آلاراق گونئی آذربایجانداکی آذربایجان میللی فعاللاری نین بوینونا حددن آرتیق بؤیوک مسئولیت دوشور. دئمک، آذربایجان میللی فعاللاری بوآغیر مسئولیتی داشیما قابیلیتینه مالیک اولمالاری اوچون ایلک اؤنجه کئچمیشدن گونوموزه گلن تک باشینالیغی، دره بگلیگی، بیر-بیرلری نین علیهینه شانتاژلا مشغول اولمانی و قارا یاخمانی بیر یانا بوراخاراق قارداشجاسینا موختلیف فیکیر نماینده لری بیر آرایا گلمه لی و گونون ضرورتینه اساسلانان مسئله لر اوزرینده فیکیر آلیش وئریشینده اولمالیدیرلار. بئله لیکله ائتنیک آذربایجان نین (قاراکیلیسا-همدان-تهران-موغانشهر،پارس آباد) یاشاییش یئرلری نین ایستر ایچریسینده، ایسترسه ده بو مکانلارین ائشیگینده(قونشولوقلارینداکی بؤلگه لرده) آذربایجان خالقینی اؤز میللی منفعتلری اوزره باشا سالماق اوچون بو مسئولیتی بؤلوشمه لیدیرلر و اونلارا گله جکده هر بیر اولاسیلیق (ایمکان) قارشیسیندا نه ائده بیلسه لر، داها یاخشی اولار دئیه اونلاری بیلگیلندیرمه لیدیرلر.
بو اوسته کی آغیر مسئولیتلری نظره آلاراق بعضی اینتئرنئت سیته لرینده کئچمیش ایلدن باشلایاراق بو گونه دک تانیق (شاهید) اولدوغوموز بیر-بیرلرینی ایستر دوغرو، ایسترسه ده یانلیش عمللری اوچون ایتتیهام ائتمک دئییل، گله جکده عیراقداکی تورکلرین دورومونا خالقیمیز دوشمه سین دئیه آذربایجان میللی فعاللاریندان داها فعال اولمالارینی آرزو ائده رک شخصی ایختیلافلارا سون قویمالارینی اونلاردان عاجیزانه ایسته ییریک.
ایشیق سؤنمز 05.02.2006