گونئی آذربایجان یازیچیلار جمعیتی نین قورولوشو دوغرولتوسوندا دوشونجه لر

هر بیر میللی توپلومدا اولدوغو کیمی گونئی آذربایجانی تمثیل ائده جک یازیچیلار جمعیتی و قورولوشونون دا  یئری بوش گؤرونر. 1998 اینجی ایل آلمانیانین کؤلن شهرینده بیر سیرا آذربایجان یازیچیلاری بو دوغرولتودا ایقدام ائده رک بیر یئره ییغیشساق دا، مسئولیت آلمیش و مسئولیت قبول ائتمیش ذاتلارین باشی سویوقلوغو ندنی ایله بو مسئله نین حیاتا کئچمه سی باش توتمامیش. بو مسئله نین اوزریندن 13 ایل کئچمه سینه باخمایاراق بوگون ده بئلنچی بیر قوروم و جمعیتین یئری بوش گؤرونر. گئچن گونلرده دوستلار آراسی گونئی آذربایجان یازیچیلار جمعیتی نین قورولماسی دوغرولتوسوندا گؤروش آلیش وئریشی اولموش. اورتایا قویولموش تکلیف اوزره قلم صاحابی[1] نین گؤروشو تکلیفنامده کی گؤروشلر ایله فرقلندیگی اوچون بو گؤروش آیریلیغینی نی آذربایجان دیل و مدنیتی ایله اوغراشانلار ایله بؤلوشمک ایسترم.

قلم صاحابی طرفیندن: - اورادا یازیچیلار جمعیتی نین هانکی بیچیمده اولاجاغینا داییر بیلگی وئریلمه میش. اوسته لیک فارس ایستعمارچیلیق سیستیمینه ده ایشاره اولونمامیش.

تکلیفنامه طرفیندن: - منجه منشوردا کیفایت قدر بوحققده بیلگی وئریلیب: - "ایران آذربایجانی نین  شاعیرلری، یازیجیلاری، مونتقیدلری و قازئته جی لری اؤز اؤلکه لری ایراندا  کولتور و هویت باخیمیندان تام بیر سورگون وضعییتده یاشاییرلار.  اولارین چوخو ایرانین خاریجینده، اوروپادا، تورکیه  ده، آذربایجان جومهوری سینده،  کانادا و آمریکادا یاشاییرلار و اؤز اثرلرینی باشقا دیللرده یازیب و نشر ائلیرلر. بیز ایرانین ائشیگینده سورگون یاشایان آذربایجانلی یازیجیلار، شاعیرلر، مونتقیدلر و قازئته جی لر، هرهانکی بیر دیلده یازدیغیمزا باخمایاراق، اولوسلار آراسی اینسان حقلری بیلدیریسینین اساسیندا فعالیت ائتمکده اولان اولوسلار آراسی قلم انجومنی نین منشورو، و اساسنامه سی نین بوتون مضمونلارینی  قبول ائدیب، اؤز فعالیتلریمیزی اولوسلار آراسی قلم انجومنی نین منشورونون دوغرولتوسوندا تمرکوزلشدیریب ، اؤز صینفی، ادبی، و فرهنگی فعالیتلریمیزه بیر سقف یاراداراق بوتون دونیادا  آذربایجانلی یازیجیلارین ، شاعیرلرین، آراشدیرماجیلارین حقینی مودافیعه ائدیب، آذربایجانین  کولتوره ل و ادبی گلیشمه سی یولوندا چالیشماق ایستییریک".

قلم صاحابی طرفیندن: بیلدیگینیز کیمی ایران ممالیکی محروسه سینده کی فارس اولمایان ائتنوسلارین یالنیز یازیچی و شاعیرلری دئییل، اونلار صینیف و طبقه آیریمی یاپیلمادان بیر کیتله، بیر میللی وارلیق اولاراق فارس ایستعمارچیلیغینا محکوم ساییلارلار. ائله اوندان یانا دا مسئله نی اله آلار، و گونئی آذربایجان یازیچیلار جمعیتی ایفاده سینی سرگیلرکن فارس ایستعمارچیلیغینی قلمدن سالماق دوزگون اولماز دئیه دوشونورم. آذربایجان میللی حرکتی، آذربایجان دیل و مدنیتینی اساس گؤتوردوگو اوچون گونئی آذربایجان (ایران آذربایجانلیلاری) یازیچی و شاعیرلری آدینا قورولموش قوروما عضو اولان هر بیر شخص ده بو دیل و مدنیته سایقیلی اولماغا چالیشمالی و آذربایجان میللی حرکتینی اؤز ماهیتیندن اوزاقلاشدیرماغا ایمکان وئرمه مه لیدیر دئیه دوشونورم. دئمک، فارس ایستعمارچیلیغینا تابع توتولموش آذربایجان خالقی نین یازیچی و شاعیرلری اؤز سیاسی و اجتماعی مقاله لرینی آذربایجان دیلینده یازمانی اؤزو اوچون ده بیر میللی بورج حئساب ائتمه لیدیر دئیه دوشونورم. شلم شوربا ایله آذربایحان یازیچیلار جمعیتی یاراتماق اولماز دئیه دوشونورم.

تکلیفنامه طرفیندن: - دوغروسو من سیزین منظوروزو باشا دوشمه دیم. نه دئمک  ایستیرسینیز ؟ بیر گونئی آذربایجان قلم انجومنین ده ن نه بکله نتینیز وار. منجه منشوردا یئترلی قدر بو  مسئله یه ایشاره اولونوب:- " ایرانین ایکی رژیمی،  پهلوی و ایسلام جومهوری سینین یاراتدیغی ایختیناق و خفقان سیزین هامیزا، بوتون اینسان حقلری تشکیلتلارینا  و اؤزللیکله ده اولوسلارآراسی قلم انجومنینه آیدیندیر... اما بیزیم اؤلکه میز ایراندا، باشقا بیر نوع خفقان دا یاشانیر کی، گرچی اونون قورخونج وارلیغی بوتون اینسانلارین گؤزونون قاباغیندادیر اما  بو حقده جیددی و مسئله نین ذاتی اهمیتینه لاییق بیر ایقدام اولونمامیشدیر. ایران چوخ میللتلی بیر اؤلکه دیر، آمما، اورادا  بیردیل، یعنی فارسی دیلی، کی  اؤلکه نین جمعیتی نین یالنیز اوچده بیرینین دیلیدیر رسمیته تانینیر. اصلینده ایسلام جومهوری سینین آنایاساسینا گؤره  فارس دیلی بوتون ایرانلی لارین رسمی دیلی ساییلیر".

قلم صاحابی طرفیندن: -     منیم قناعتیمه اساسن ایران ممالیکی محروسه سینده کی فارس اولمایان ائتنوسلار، فارس دیل و مدنیتی نی اساس گؤتورموش فارس مدنیت راسیستلیگی و فارس ایشتعمارچیلیغی ایله اوز اوزه دیرلر. فارس ایستعمارچیلیغینا اساسن "ایران (فارس ایمپیریاسی)" فارس اولمایان ائتنوسلارین مملکتی دئییل، یاخشی دورومدا اونلارین آنا تورپاقلاری فارسلیغین آیریلماز ترکیب حیصصه سی و اونلار دا تئزلیکجه فارس اولمالیدیرلار. دئمک، مملکت و وطن صاحابی اولماق اوچون مجادیله وئرمک لازیم. سیستیم منظور اولدوقدا حاکیم اولدوغو دورومدان آیدین بیر دوشونجه یه صاحیب اولمامیز منظور اولموش. دئمک، مسئله یالنیز بعضیلری یورماغا چالیشدیقلاری اختناق دئییل، فارس ایستعمارچیلیغی و فارسلیق سیستیمی هر بیر بیچیمده فارس حاکیمیتلری نین بیرینجی قوروماغا چالیشدیقلاری مقام ساییلار. بو مقاملاری گؤز آردی ائتمک میللی مسئله آچیسیندان کئچمیشده کی یالنیش سیاستلری بیر داها باشقا دوغرولتودا و جهتده تیکرار ائتمگه یول آچاجاق گؤرونر.

تکلیفنامه طرفیندن:- بیز سیاسی تشکیلات قورماق ایسته میریک. بیزیم هدفیمیز گونئی آذربایجان یازارلار اوجاغی یارادماق دیر. بورادا صینیف وطبقه و باشقا تبعیض لردن سؤز گئتمیر و گئده ده بیلمز. هر سؤزون اوزونون یئری ومقامی وار. منشوردا قلم انجومنینین اساس خاراکتری گتیریلیب دیر:- "اینسان حقلری بیلدیریسینین اساسیندا فعالیت ائتمکده اولان اولوسلارآراسی قلم انجومنی نین منشورو، و اساسنامه سی نین بوتون مضمونلارینی  قبول ائدیب، اؤز فعالیتلریمیزی اولوسلار آراسی قلم انجومنی نین منشورونون دوغرولتوسوندا تمرکوزلشدیریب ، اؤز صینفی، ادبی، و فرهنگی فعالیتلریمیزه بیر سقف یاراداراق بوتون دونیادا  آذربایجانلی یازیجیلارین ، شاعیرلرین، آراشدیرماجیلارین حقینی مودافیعه ائدیب، آذربایجانین  کولتوره ل و ادبی گلیشمه سی یولوندا چالیشماق ایستییریک-. منجه قلم انجومنینین  منشورو وهدفلری  سیاسی بیر تشکیلاتین پلاتفورمو اولمامالی دیر ".

قلم صاحابی طرفیندن:- بو ایشاره ائتدیگینیز جمعیت هر هانسی صنفی و سیاسی بیر ماهیت داشیمایاجاقسا، آذربایحان دیل و مدنیتی نین قایقیسینا قالمایاجاقسا، بو جمعیتین یارانماسینا هانکی ائحتیاج دویولور دئیه آرتیق دوشونمه یه چالیشمالی ییق. بیلیندیگی کیمی آذربایجان کلمه سی نین قاباریق بیچیمده دیله گتیریلمه سی آرتیق سیاسی ماهیت داشییار مقامدا یئر آلار. دئمک، اؤز دیل و مدنیتلرینه حاکیم توپلوملارین یازیچی و شاعیرلری ایله وارلیغی ایستعمارچیلیق اساسیندا تالانا اوغرامیش و یوخلوغا محکوم  اولموش توپلوملارین یازیچی و شاعیرلری آراسیندا اولان فرقلری گؤرمزلیکدن گلمک سیاسی باخیمدان آذربایجانلی یازیچی و شاعیرلر توپلومونو خنثی بیر دوروما دوشوره جک بیر داورانیش ساییلار. او دا "ایرانیت" مقوله سینده اریمه نین بیر گؤسترگه سی ساییلار.

تکلیفنامه طرفیندن:- سیز یازیرسینیز:«آذربایجان خالقی نین یازیچیسی و شاعیری اؤز سیاسی و اجتماعی مقاله لرینی آذربایجان دیلینده یازمانی اؤزو اوچون ده بیر میللی بورج حئساب ائتمه لیدیر دئیه دوشونورم». سیزین بو دوشونجه نیز اوزامان صائب دیر کی بیزیم مستقیل دوولتیمیز اولا و اولکه ده آذربایجان تورجه سی رسمی دوولت دیلی و دوولتین حمایه سینده اولا و خالق اؤز دیلینده تحصیل آلابیله .ایندی بیلدیگینیر کیمی بیزیم دیلیمیز یاساق دیر و اؤز آنادیلینده یازارلاریمیز اولدوقجا آز و نادیر دیر. واونلاردا دؤزگون آنا دیلینده تحصیل آلمایبلار" .

قلم صاحابی طرفیندن:- مستقیل دؤلتیمیز اولدوقدان سونرا آذربایجان یازیچیلار و شاعیرلری جمعیتی خاریجه دیدرگین دوشموشلر طرفیندن دئییل، آذربایجانین شهر و کندلرینده بئلنچی جمعیتلرین یارانماسی قاچینیلماز ساییلار. او زامان یالنیز سیاسی و اجتماعی مقاله لر دئییل، بوتون ساحه لرده خالق دیلی رسمی دئیه قبول اولونار. دئمک، ایچریده کی توپلومون یازیب اوخوما دیلینه یاساق قویولوبسا، ائشیکده کی ندن یاساق وار دئیه اؤز دیلینده یازیب یاراتمادان چکینسین. دئمک، یاساق قویولوبسا، یاساقلارا اویماق دا او یاساغی رسمیته تانیماق دوغرولتوسوندا خیدمت ائده جک داورانیش ساییلار. دیلیمیزده یازارکن، یالنیز یازماق دئییل، دیلیمیزده دوشونوب یاشامانی، کیملیگیمیزی یاشاتمانی دا تیکرارلامیش اولاریق. اوندان یانا دا آذربایجان یازیچیلار و شاعیرلر جمعیتی دئیه بئلنچی بیر قورومون یارانماسینا یؤنلرکن آذربایجان دیل و مدنیتی اساسیندا حرکت ائتمه نی داها دا میللی چیخار و منافعیمیزه اویقون حئساب ائدیرم.

تکلیفنامه طرفیندن:- "... بیر مملکتده کی اینسانین اؤز دیلی قداغان دیر و اؤز انا دیلینین حقینده بئله دانيشماغين موجازاتی وار و یوز ایله یاخیندیر کی پهلوی رژیمی و ایسلام جمهوری رژیمی بو دیلی تاپدالایب  - ازیب وتورک دیلینین یئرینه زور ايله فارس دیلین تورکلرین بوغازینا سوخوب، نئجه بودیلده یازارلار عمله گله بیلر! طبيعى دیر کی بیر سیرا انسانلا ر اؤزلری زحمت چکیب و اؤز یانیندا بو دیلی اؤيرنيبلرسوروشمالى ييق کى٬ مکتب سيز بير ميلتين یازارلاری تک باشينا نه درجه ده اؤز آنا ديللرينى اؤيره نمگه امکانلارى وار؟ دیلی اؤيرنمگه امکانات لازیمدیر. بو ايش دؤلتين وظيفه سيدير. ميلی دؤلت لازیم دیر. اوشاق باغچاسیندان توتموش مدرسه لرده ودانشگاه لاردا اجباری دیل اولمایدیر. آذربایجانین ميلی – دموکراتیک حرکاتینین فعالارینین اساس هدفلریندن بیری ده آذربایجان تورکجه سینین رسمی و دؤلت دیلی اولماسی دیر!"

قلم صاحابی طرفیندن:- اوسته گؤروندوگو و من ده یوخاریدا ایشاره ائتدیگیم کیمی مسئله یه یاناشمادا دوشونجه آیریلیغی وار. بیر چوخلاری مسئله نی پهلوی و ایسلام جمهوریسی رژیمی ایله ایضاح ائتمگه چالیشارلار. اوسته لیک نئچه بیر حاکیمیت سیستیمی ایله قارشی قارشییا قالدیغیمیزی دا قبول ائتمیش دئییللر. بو دوشونجه صاحابلاری فیلی وار اولدوغو کیمی دئییل، اونلار فیلین اللری چاتدیغی بؤلوملرینی هر هانسی بیر شئییه بنزتمگه چالیشارلار. ائله اوندان یانا دا فارس ایستعمارچیلیغی یئرینه هر هانکی بیر رژیم سؤز قونوسو اولموش و اولاجاق گؤرونر. آشاغیدا ایشاره ائتدیگینیز مقاملارا آچیلیق گتیرسه نیز، یاخشی اولار دئیه دوشونورم:

-          (تکلیفنامه طرفیندن ) "البته ایسلام جمهوریسی بؤيوک ایمکاناتا مالیک دیر.   او اؤز آداملارین تورک ديللى اؤلکه لره گؤندريب و بو « گؤندريلميش آداملارين» تورک دیلینى موکمل اؤيرنمکلرينى تشکيل ائدر! يا خود (قوزئى آذربايجاندا ) باکى دا ياشاييب و اذربايجان تورکجه سينى ياخشى باشاران بير پارا آداملارى اؤز قوللوقچوسو کيمى ساتين آلا بيلر!"

قلم صاحابی طرفیندن:- اوسته کی مقاملار بیزیم  اوزرینده دوشونجه و فیکیر یئریتدیگیمیز مقاملاری ایچرمیش دئییل. فارس ایستعمار حاکیمییتی لاتین آمریکالی نین دیلینده اورالاردا اؤزونه آیاق یئری آچماق اوچون متخصصلر تربیت ائدیلمگه پول و وساییط آییردیغینی نظره آلارساق، سؤمورگه آلتیندا توتموش توپلومون دیل و مدنیتی نین نئجه باسدیریلماسی اوچون او توپلومون گوجلو و ظعیف مقاملاری نین اؤیرنیلمه سی نین ده واجیب اولدوغونو گؤزدن قاچیرمادیغی طبیعی قلمه آلینمالیدیر. سحر کانالی کیمی تئلئویزیون کانالی و رادیولارین دا ایشه سالینماسی بو دوغرولتودا دگرلندیریلمه لیدیر.

تکلیفنامه طرفیندن: - "فارس دیلی هر حالد  ایراندا عملا ارتیباطی دیل رولون اویناییر. فارس دیلینده یازیب اوخوماماق عملده بیز آذربایجانلیلاری و ایراندا یاشایان تورکلری کور و دیلسیز ساخلاماق دئمک دیر. نه اولار ، قوی آذربایجان میلتى نین اؤزونون حاکمیتی اولسون  اوندا فارس دیلین قدغن ده ائتمک اولار! نئجه کی لیتوانی ده و ایستونی ده و یا اوکراین دا ائدیب لر!... بیز اگر میثال اوچون فارس دیلینی بایکوت ائدک وبودیلدن ایستفاده ائتمییک؛ اوندا دئملی بیز ایستیریک بیر میللتی کار وکور ساخلایاق."

قلم صاحابی طرفیندن:- اوسته ایشاره ائتدیگینیز مقاملار دا چلیشکه لی مقاملاردیر. سورگونده یاشایان آذربایجان یازیچیلار جمعیتی هارا و فارس ایستعمارچیلیغینا توتولموش آذربایجان توپلومو و تورکلرین توتولدوقلاری وضعیت هارا؟ دئمک، آذربایجان یازیچیلار جمعتی اؤزلوگونده آذربایجان دیل و مدنیتی نی اساس گؤتورمه لیدیر. میللی کیملیک و منلیگی نین ضرورتینی درک ائتمه میشلر، یوخسا فارس ایستعماری نین تضییقینه معروض قالمیشلار  حیاتین آخارینا گؤره اؤزلرینی عیارلاماغا چالیشارلار. کیمسه ده اونلاری باشقا یولا زورلایاجاق مقامدا دئییل.

اتک یازی: